Policia e Shkodrës ka zbuluar 16 pajisje elektronike që shërbenin për gjenerimin e kriptomonedhave virtuale, me lidhje të paligjshme të energjisë elektrike.
Forcat blu kanë bërë të mundur vënien në pranga të një punonjësi, ndërsa është shpallur në kërkim pronari i këtyre pajisjeve, një 21 vjeçar me inicialet J. M.
“Gjenden dhe sekuestrohen në një magazinë, 16 pajisje elektronike që shërbenin për gjenerimin e kriptomonedhave virtuale, me lidhje të paligjshme të energjisë elektrike. Shpallet në kërkim poseduesi i pajisjeve. Vihet në pranga bashkëpunëtori i tij”.
Procedohet në gjendje të lirë punonjësi i OSHEE-së, për shpërdorim detyre.
Lidhur me operacionin policor të koduar “Avalon”, në kuadër të të cilit është ushtruar kontroll në këtë magazinë dhe është shpallur në kërkim shtetasi:
“J. M., 21 vjeç, banues në Shkodër, për veprat penale “Mashtrimi kompjuterik”; “Vjedhja e energjisë elektrike ose e impulseve telefonike”, kryer në bashkëpunim; “Fshehja e të ardhurave”; “Ushtrimi pa licencë i aktivitetit tregtar” dhe “Pastrimi i produkteve të veprës penale””, thuhet në njoftim.
Gjithashtu, si rezultat i këtij operacioni u arrestua në flagrancë shtetasi E. M., 43 vjeç, banues në Shkodër, ndërsa sipas policisë i lirë u la F. B., 33 vjeç, banues në Shkodër, me detyrë lexues i aparatit matës, në OSHEE Shkodër, për veprën penale “Shperdorimi i detyrës”, pasi dyshohet se ky shtetas ka mundësuar furnizimin e pajisjeve që gjenerojnë kriptomonedha virtuale, me lidhje të paligjshme të energjisë elektrike.