Adri Kelmendi, historia e dilerit të heroinës që Prokuroria hoqi dorë nga ndjekja e tij

Visar Duriqi & Beadin Syla

Adri Kelmendi, historia e dilerit të heroinës që Prokuroria hoqi dorë nga ndjekja e tij

Janë pamjet e një laboratori droge në kryeqytetin kosovar. Do të kultivonte mariuhanë në kushte artificiale. I kamufluar si bodrum. Lidhjet familjare të atyre që e drejtonin këtë laborator me politikën do ta bënin atë edhe më të famshëm.

Republika e Kosovës ka një histori të çuditshme me substancat narkotike. Vendi njihet si rrugë transit për to, por përmasa e përdorimit të tyre ende nuk konsiderohet alarmante. Ose thënë ndryshe, nëpër Kosovë kalon shumë më shumë drogë se sa që mbetet për përdorim.

Por, për krejt vitet kur kontrollin e organeve të zbatimit të ligjit e morën vendorët, dhe ndërkombëtarët ishin më shumë vëzhgues, sipas personazheve të intervistuar për këtë emision, ka çdo herë më pak bosë droge që janë kapur. Pak grupe janë shkatërruar nga vetë forcat e rendit, dhe operacionet e mëdha kryesisht kanë qenë ato që ishin të përbashkëta me agjenci të huaja.

Emisioni “InDoks” ka shfaqur rastet më të mëdha kur Kosova goditi grupet e drogës. Edhe ato raste kur u përfshinë të afërm të politikës. Edhe bosë droge me famë botërore.

 

Në këtë episod për herë të parë para publikut kosovarë shfaqet historia e dilerit të heroinës nga komuna e Rahovecit dhe prapaskenat se si Prokuroria hoqi dorë nga ndjekja e tij.

Është fshati Kramovik i komunës së Rahovecit. Në përgjithësi një fshat i qet, i skajuar në rrugën që çon në Gjakovë dhe jo i njohur për publikun. I panjohur për publikun ishte edhe njëri nga banorët e këtij fshati.

Ky është Adri Kelmendi. I njohur në botën e krimit, sidomos atë të heroinës. I njohur edhe për institucionet e sigurisë. InDoks për herë të parë sjell para publikut historinë e këtij dileri të njërës nga drogat më të rrezikshme.

Në shtatorin e viti 2012, pas një operacioni që i kishte paraprirë një hetim, Adri Kelmendi do të arrestohej. Pos veprës penale të shitjes së heroinës, atij iu gjetën edhe armë. Edhe u akuzua se sulmoi policinë.

Në këtë operacion i gjetën në posedim hiç më pak se sa 6 kilogramë heroinë. Iu gjetën edhe dy armë zjarri e një arsenal prej 80 fishekësh. Po ashtu iu gjetën dhe tri vetura, që dyshohej se ishin përdorur nga ky diler i heroinës.

Rasti shkoi në favor të forcave të rendit, pasi që i njëjti do të gjendej fajtor nga Gjykata, dhe në vitin 2012 u dënuar me tri vite e gjysmë burg.

Ai do të dërgohej në vuajtje në të dënimit në burgun e Lipjanit. Krejt pak muaj para se ta përfundonte krejt dënimin, ai u lirua për vikend. Por, ai nuk u kthye më kurrë që ta përfundonte dënimin e mbetur. U kthye në fshatin Kramovik të Rahovecit. Në fshatin ku ka në pronësi më shumë se sa një shtëpi.

Gati thuajse i papenguar nga askush, nga qershori i vitit 2015 ai edhe pse në arrati, për katër vite e shtatë muaj do të vazhdonte të jetonte kryesisht në shtëpitë e tij në fshatin Kramovik. Dyshohet se po kaq gjatë vazhdoi biznesin e tij me shitjen e heroinës.

Kjo situatë e tij me biznes droge edhe në arrati do të pengohej nga operacioni policor i koduar “Blitz”. Këtij operacioni do ti paraprinte një hetim i përbashkët i disa agjencive të zbatimit të ligjit, që infiltruan edhe njerëz brenda biznesit të tij, por siguruan edhe deklarata të dëshmitarëve që blinin nga ai heroinë.

Operacioni i tij kriminal me heroinë, pas 4 vitesh e 7 muajsh në arrati, do të ndërpritej më 15 janar të vitit 2020 kur ai edhe u arrestua. U dha edhe një urdhër për t’ia bastisur pronat.

Por, siç edhe pritej prej dikujt me përvojë të gjatë në krimin e heroinës, nuk do të gjendej substanca në pronat e tij. Në favor të tij ishte edhe mbikëqyrja që dyshohet që ai vetë e ka vendosur. ‘Rruga ka qenë e mbikëqyrur me kamera nga i paraqituri i cili e ka monitoruar gjatë gjithë kohës rrugën”, thuhet në dokumentet e rastit.

Dokumentet e dosjes se Adri Kelmendit thonë që ai kishte vendosur kamera që nuk ruajnë incizime, model i veçantë, por që i kontrollonte vetëm ai nga telefoni i tij.

 

Kur u bastisën pronat e Adri Kelmendit u gjetën pajisje për kamera vëzhguese, dhe pajisje të tjera elektronike. Municion e pjesë armësh të ndryshme përfshirë edhe pjesë kallashnikovi.

Atij iu gjet edhe kjo veturë, Golf 4, por që për çudi, edhe pse ka tabela të regjistrimit të Kosovës, Policia këtë regjistrim nuk e gjen askund nëpër databazat e shtetit. Madje edhe numri i shasisë së veturës nuk mund të identifikohet se prej nga e ka prejardhjen kjo veturë e kush e ka sjellë në Kosovë. Dyshimet janë që ai përdorte këtë veturë të paregjistruar askund që të mos linte gjurmë gjatë biznesit të tij me heroinën.

Puna disa mujore e Policisë kosovare dhe e agjencive të tjera të zbatimit të ligjit do të shkonte poshtë. Krejt kjo me një vendim dy faqesh të nënshkruar nga Prokuroria Afërdita Beqiraj- Hyseni në Prokurorinë Themelore në Gjakovë.

Kjo Prokurore priti vetëm që forenzika të sillte një raport. Dhe, pasi që ata konstatuan se nuk u gjet drogë, e hodhi poshtë krejt kallëzimin penal të Policisë.

As Prokuroria në të cilën është e angazhuar Prokurorja Afërdita Beqiraj-Hyseni e as vetë ajo nuk kanë pranuar që të flasin për këtë rast. As avokati që i ishte caktuar sipas detyrës zyrtare Adri Kelmendit nuk ka pranuar që të flas. Ai edhe ashtu kishte fare pak punë, pasi që Kemendi ishte mbrojtur në heshtje.

Por, çka injoroi prej fakteve kjo Prokurori në rastin e Adri Kelmendit? Fillimisht është historia e tij me heroinën, ku ai veçse është dënuar më herët për tregti ilegale me këtë drogë të rrezikshme. Për 6 kilogramë madje.

Fillimisht Policia intervistuan edhe taksistin që kishte dërguar disa të varur nga heroina për të blerë këtë drogë tek Adri Kelmendi. Ai i kishte përmendur me emër këta persona.

Policia po ashtu intervistoi një person që ka konfirmuar që përdor heroinë, e po ashtu që ka blerë heroinë Adri Kelmendi. Ai thotë se heroinën e blinte me 20 euro gramin, por Kelmendi aplikonte edhe zbritje për ata që merrnin më shumë. “Nëse i merr 5 gramë, paguan nga 15 euro për gram”, dëshmon ky dëshmitar. Ky dëshmitar madje përmend në deklaratën e tij edhe katër persona tjerë me të cilët ka shkuar te Adri Kelmendi.

Një tjetër person i varruar nga heroina po ashtu ka dëshmuar në rast se ka blerë disa herë këtë substancë nga Adri Kelmendi, por nëse nuk shkonte vetë për ta marrë, atij i shtije një gram për 25 euro. Po ashtu edhe ai përmend edhe dy persona të tjerë që kanë shkuar bashkë tek Kelmendi për të blerë heroinë.

Më 4 shkurt 2020 Policia intervistoi edhe një tjetër të varur nga heroina që tregon se ka blerë shumë herë nga një ose dy gramë nga Adri Kelmendi. Ai në këtë dëshmi që e ka InDoks tregon se Kelmendi kurrë nuk ka përdorur telefon për biznes, pos takime direkte. Ai kreu blerjen e tij krejt pak ditë para se të arrestohej Kelmendi, dhe pasi që nuk kishte para, ia la si pagesë një mjet pune të ndërtimtarisë.

Policia intervistoi edhe dëshmitarë të tjerë. InDoks ka mësuar se madje organet e zbatimit të ligjit në vend kanë në posedim edhe video dëshmi ku Adri Kelmendi shihet direkt duke shitur heroinë.

Krejt këto prova u injoruan nga Prokuroria në Gjakovë. Kjo prokurori madje injoroi edhe faktin që Adri Kelmendi ka një të kaluar kriminale, pos me heroinë, i përfshirë edhe në krime të tjera.

Kur ai u dënua për 6 kilogramë heroinë, pak para se të i përfundonte koha e dënimit, u arratis nga Burgu i Lipjanit. Jetoi 4 vite e 7 muaj në arrati e ku me prova dyshohet se merrej përsëri me shitje të kësaj droge.

Por, e kaluara e tij kriminale është e datuar qe 20 vite. Ai në vitin 2001, u arrestua nën dyshimin për vrasje të rëndë. U dyshua se vrau Sefer Seferajn. Por, për çudi, edhe atëherë u dënua vetëm për posedim të armës pa leje, por u tha që nuk kishte prova se kreu vrasje. U dënua me 1 vit e gjysmë burg.

Po atë vit, ai kishte qenë edhe i dyshuar për sulm ndaj ish-gruas së tij, e megjithatë gjurmimi i rastit shkon vetëm deri kur u dërgua në Prokurori, por jo edhe çfarë vendimi mori Gjyqi.

Një vit më vonë, në vitin 2002 ai ishte i dyshuar edhe në një rast sulm ndaj personit zyrtar, por as këtu nuk u gjenden detaje të rastit.

Edhe në vitin 2005 u arrestua, por as Policia nuk arriti të gjente më shumë në këtë rast, pos që u arrestua për sulm e dëmtim të pasurisë së dikujt tjetër.

Po ashtu Polica gjeti që ai ishte dënuar edhe për kërcenim në vitin 2010, por nuk jepen shumë detaje. Po atë vit, figuron që ka qenë i dyshuar edhe një rast të prishjes së rendit publik, por as organet e ndjekjes së krimit nuk kanë shumë të dhëna për të.

Adri Kelmendi ka një të kaluar të bujshme kriminale. Është kapur edhe me kilogramë të heroinës. Është dyshuar edhe për vrasje të rëndë. Është arratisur edhe prej burgut. Ka edhe shumë dëshmitarë, e madje organet e rendit, siç mëson InDoks, kanë edhe video kur ai ka shitur heroinë duke qenë në arrati, por krejt këto nuk i mjaftuan Prokurorisë në Gjakovë. E hodhi poshtë kallëzimin penal të policisë edhe pas një pune të gjatë të tyre. InDoks merr vesh se Adri Kelmendi do të lirohet nga burgu në fund të vitit 2020.

Kosova në raporte ndërkombëtare përshkruhet si vend transit i drogës, përfshirë këtu edhe i heroinës. Por, korrupsioni në të cilin janë përfshirë institucionet e sigurisë, për një kohë e kishte shndërruar Republikën edhe në vend strehimi për narko-dilerë ndërkombëtarë.

Gazeta Insajderi kishte publikuar një seri shkrimesh për identitete të rreme që morën në Ministrinë e Punëve të Brendshme të Kosovës edhe dilerët e drogës nga Turqia. Edhe për lidhjet e tyre që shkonin deri te bashkëpunëtorët e vëllait të Presidentit Hashim Thaçi.

Hulumtimi i Insajderit kishte gjetur se të paktën tre trafikantë të drogës, një vrasës me pagesë, dhe një i dënuar me dhjetë vjet burgim në Turqi, kanë arritur të bëhen shtetas të Kosovës, duke u pajisur me të gjitha dokumentet. Turku i gjetur i vdekur në Prishtinë, Nejdet Cesuroglu, në banesën e të cilit ishin gjetur 113 kilogramë heroinë, ka marrë dy identitete në. Iskender Sale, kishte marrë po ashtu dy identitete, Xhemajl Shala dhe Skender Sheremeti. Vrasësi malazias, Mario Millosheviq, kishte marrë shtetësinë kosovare nën emrin, Miroslav Kostiq. Ndërkaq, turkja, Ozden Gur, kishte marrë shtetësi me emrin Filloreta Rama. Këta persona shtetësinë e kanë marrë duke paguar e korruptuar zyrtar të MPB-së.

Betim Musliu është një gazetar që ka raportuar gjatë në fushën e drejtësisë. Sot bashkë-drejton Institutin e Kosovës për Drejtësi. Nga puna e tij edhe në monitorim të rasteve jep të dhëna shqetësuese.

“Në këtë rast bëhet fjale për tregun e diskoteve që bëhet shpërndarja që mundësia për tu kapur është e madhe po ata që janë në këtë sektorë vijnë në një farë forme në mbrojte duke mos vepruar, nëse secili raste është i pamundshëm zhvillimin e kësaj veprimtarie në këtë sistem të drejtësie, natyrisht që kontakti i parë për ta bërë luftën kundër drogave janë policët. Natyrisht që një numër i policëve i përfshirë në mënyrën se si mund të jenë përfitues duke mos vepruar, çka ndërmarrin policet është heshtja e tyre përballë asaj që shohin, është tejet shqetësuese”, thotë Musliu.

E, për tregun e heroinës në Kosovë, një rast i madh gjyqësor ka vite që zhvillohet në Kosovë. Është rasti kundër Naser Kelmendit, i njohur si bosi ballkanik i drogës, pa përjashtuar edhe heroinën. Ai në Kosovë pos tjerash, ku përfshihet edhe vrasja, akuzohet për krijimin e një rrjeti të madh të shpërndarjes së heroinës, e që thuhet në aktakuzë që atë rrjet e ka drejtuar për afro 12 vite.

Ai akuzohet nga Prokuroria në Kosovë ka organizuar transportin, shitjen dhe shpërndarjen e një sasie të madhe heroine, ekstazie, spind dhe droga të tjera, nëpërmjet një rrjeti të organizuar kriminal të themeluar mirë, që përfshinte përzierjen e narkotikëve, dërgesat ndërmjet Turqisë, rajonit të Ballkanit dhe Holandës, por edhe vendet tjera evropiane. Gjykimi kundër tij në Kosovë po has në vështirësi e shtyrje seancash.

Policia e Kosovës në anën tjetër thotë që për dy vite ka zhvilluar shumë aksione që kanë goditur grupet kriminale që merren me trafikim e shitje droge. Të dhënat e tyre për dy vite thonë që janë kapur krejt afro 10 kilogramë heroinë. Po ashtu kanë kapur mbi 2 kilogramë kokainë. Në lidhje me rastet e heroinës, për dy vite janë arrestuar 50 persona.  Policia bënë me dije se ka kapur për këto dy vite afro 900 kilogram mariuhanë.

Policia i ka thënë InDoks-it se për dy vite ka shkatërruar 17 grupe kriminale të drogës, dhe për to janë arrestuar e proceduar 80 persona. Bënë me dije se sipas analizave të rasteve del që në Kosovë ka rënie të trendit të përuruesve të heroinës, por në anën tjetër ka tendencë rritje të përdorimit të marihuanës dhe kokainës.

“Porosia e drogave sintetike përmes postës,  është trend i ri në Republikën e Kosovës”, thuhet në përgjigjet e Policisë.

Një rast kur një kosovarë u dënua me dënim prej 15 vitesh në burg për tregti me drogë ishte edhe rasti i Qamil Shabanit nga Ferizaj, i njohur si “Qorri”. Ai ishte dënuar në vitin 2009, dhe pse përveç 15 viteve në burg iu shqiptua edhe gjobë prej 100 mijë eurosh, ajo gjobë kohë të gjatë nuk ishte ekzekutuar.

Prokuroria në Ferizaj ka konfirmuar për InDoks se edhe ndaj qytetarit Drin Zatriqi, i biri i ish-drejtorit të RTK-së, Agim Zatriqi, është ngritur një aktakuzë për blerja, posedimi, shpërndarje të narkotikëve. Aktakuza është konfirmuar në vitin 2012.

Ndaj tij ekziston edhe një fletë-arrest pasi që i njëjti nuk jeton prej vitesh në Kosovë. Zatriqi, që tash haptazi mbështet partinë në pushtet, Vetëvendosjen e AalbinKurtit, ka komentuar publikimin e këtyre fakteve se rasti është i vitit 2010 dhe gjatë bastisjes Policia atij në rroba ia ka gjetur vetëm një gjysmë cigare, “spllif”, siç e ka quajtur ai.

Insajderi ka publikuar ditë më parë edhe pamje nga laboratori i mariuhanës që Policia e kishte gjetur në Prishtinë e ku për të u arrestuan edhe nipërit e zyrtares së Vetëvendosjes, Nazlie Bala, që aktualisht shërben si këshilltare e Ministres së Drejtësisë, Albulena Haxhiu. /Insajderi.org