Njeriu i afërt i Trumpit e quan Kurtin antiamerikan

Qëndrimet e Albin Kurtit ndaj shtetit amerikan duket se nuk do të ndërrojnë – gjithmonë kundër – si nga pushteti, ashtu edhe nga opozita.

Njeriu i afërt i Trumpit e quan Kurtin antiamerikan

Lideri i Vetëvendosjes, Albin Kurti, edhe një herë ka dalë kundër Shteteve të Bashkuara të Amerikës, veçse tash nga roli i kryeopozitarit.

Nga kjo ‘pozitë’ që e mban tash e thuajse gjashtë muaj, prej kur është rrëzuar nga Kuvendi, ish-kryeministri ka thënë se nëse e merr edhe një herë atë post, po nga ai rol nuk do ta respektojë Marrëveshjen e Uashingtonit të arritur në Shtëpinë e Bardhë më 4 shtator.

Edhe katër ditë pas nënshkrimit të saj nën praninë e Donald Trump, presidentit të shtetit më të fuqishëm në botë – Kurti s’ka reshtur së thëni se marrëveshja është nënshkruar nga një kryeministër jolegjitim – duke iu referuar kështu Avdullah Hotit, ish-zëvendësit të tij në qeverisjen e kaluar.

“Ne nuk kemi detyrime për zotimet e kryeministrit të paligjshëm të Kosovës kur të kthehemi në detyrë. Nënshkrimi i tij poshtë teksteve jo koherente dhe jo transparente është kundër vullnetit të popullit, rendit demokratik dhe shkel Kushtetutën dhe ligjet e Kosovës”, ka shkruar Kurti në Tëitter, transmeton Gazeta Insajderi.

Tutje, ish-kryeministri ka thënë se “ndërmjetësit duhet të përmbahen nga nxitja e marrëveshjeve që shkaktojnë përçarje të mëtejshme midis Kosovës dhe Serbisë”.

“Vetëm dialogu parimor dhe i përgatitur mirë çon në marrëveshje të drejta dhe të qëndrueshme”, përfundon ai.

I menjëhershëm ka qenë kundër-reagimi i Richard Grenellit, emisarit të Donald Trump për dialogun Kosovë-Serbi.

“Një gjë është e sigurt, ju gjithmonë mund të llogarisni në Kurtin që të jetë kundër SHBA-ve”,  ka shkruar Grenell në Twitter, transmeton Gazeta Insajderi.

“Lufta” e Albin Kurtit me Shtetet e Bashkuara të Amerikës

Ndonëse qëndroi shumë pak ditë në qeverisje, as 50 të plota, Albin Kurti, doli kundër shtetit më të fuqishëm në botë, Amerikës.

Kur administrata e udhëhequr nga Donald Trump kërkonte që Kosova menjëherë ta hiqte taksën 100% ndaj mallrave serbe, Kurti, atëkohë nga pozita e kryeministrit thoshte se ajo duhej të hiqej pjesërisht.

Në një rrugë, një nga liderët më të votuar, kundërshtonte qëndrimet e shtetit amerikan, por edhe ato të Lidhjes Demokratike të Kosovës, partisë që e kishte partnere në qeverisje.

Kjo nuk ishte hera e parë që Kurti kundërshtoi zëshëm presidentët amerikanë, siç edhe ka thënë Grenell sot: “ai ishte kundër ideve të Obamas, ishte kundër ideve të Bushit”.

Kryetari i Vetëvendosjes ishte kundër George Bushit, kur ky i fundit mbështeste konferencën e Vjenës dhe pakon e Martti Ahtisaarit, për të cilën Kurti kishte thënë se e zbeh Pavarësinë e Kosovës dhe sovranitetin e saj.

I njëjti poashtu ishte treguar shumë dyshues ndaj deklaratave, të ish-presidentit Bush, kur më 10 qershor të vitit 2007 kishte treguar se çështja e shpalljes së Pavarësisë ishte vetëm çështje kohësh.

“Mjaftë është mjaftë. Kosova është e pavarur”, kishte deklaruar Bush gjatë vizitës së tij në Tiranë pak muaj para 17 shkurtit 2008, kur u shpallë Kosova Republikë, transmeton Gazeta Insajderi.

“Bushi nuk dha asnjë afat, dhe këtu unë jam pak skeptik”, kishte komentuar deklaratën e tij, atëkohë Kurti.

I pari i Vetëvendosjes kishte kundërshtuar fuqishëm edhe ish-presidentin Barak Obama, për qëndrimin e tij ndaj demarkacionit në shtatorin e 2015-ës

“Nënshkrimi i marrëveshjes historike për demarkacionin e kufirit në mes Kosovës dhe Malit të Zi me 26 gusht, demonstroi edhe më tutje përcaktimin e Kosovës për marrëdhënie të mira fqinjësore dhe vendosmërinë tuaj, që çështjet rajonale të adresohen në frymën e dialogut dhe bashkëpunimit”, kishte thënë Obama, shkruan Gazeta Insajderi.

Ndërsa, Kurti kishte adresuar kërcënime në drejtim të Qeverisë, duke thënë se marrëveshje për Demarkacionin kishte vdekur dhe si e tillë nuk do të ringjallej.

“Ajo marrëveshje ka vdekur dhe ne nuk lejojmë ringjalljen e saj”, kishte deklaruar Kurti, transmeton Gazeta Insajderi.

Qëndrimet e Albin Kurtit ndaj shtetit amerikan duket se nuk do të ndërrojnë – gjithmonë kundër – si nga opozita, ashtu edhe nga pushteti të cilin e humbi, por që pretendon ta merr sërish./GazetaInsajderi/