Njeriu i akuzuar për afërsi me PDK e VV, synon të bëhet Avokat i Popullit

Enver Hasani njeriu që për disa vite me radhë është akuzuar si njeri i afërm me Partinë Demokratike të Kosovës, tashmë i ka hyrë garës për një pozitë tjetër të rëndësishme publike. Pret të votohet për Avokat të Popullit. Sa ishte në krye të Gjykatës Kushtetuese,  Lëvizja Vetëvendosje, e quante "Kali" që tërhiqte “qerren” e PDK-së të cilën e drejtonin “kokat” e Hashim Thaçit dhe Kadri Veselit. Por qëndrimet e VV-së ndaj Hasanit ndryshuan gjatë këtij viti kur ai dha një deklaratë në favor të Albin Kurtit, pasi ky i fundit u rrëzua nga pushteti.

Njeriu i akuzuar për afërsi me PDK e VV, synon të bëhet Avokat i Popullit

Në krye të Institucionit të Avokatit të Popullit po synon të ngjitet Enver Hasani, një njeri që për disa vite ishte akuzuar si njeri i afërm me Partinë Demokratike të Kosovës. Si kryetar i Gjykatës Kushtetuese akuzohej se ndihmonte këtë parti sidomos në vitin 2014 kur partitë opozitare ishin bashkuar për ta rrëzuar PDK-së. Kushtetuesja kishte marrë vendim se qeveria mund të formohej vetëm nga partia fituese e zgjedhjeve.

Ish-kryetari i Gjykatës Kushtetuese dhe ish-rektori i Universitetit të Prishtinës, Enver Hasani e ka konfirmuar se tashme i ka hy garës për një mandat pesë vjeçar në mbrojtje të të drejtave të qytetarëve, shkruan Gazeta Insajderi.

Avokati i Popullit mbron të drejtat, liritë dhe interesat e ligjshëm të individit nga veprimet ose mosveprimet e paligjshme e të parregullta të organeve të administratës publike, si dhe të të tretëve që veprojnë për llogari të saj. Për më tepër ai është nxitës i standardeve më të larta të të drejtave dhe lirive të njeriut në vend.

Avokatit të tanishëm të Popullit, Hilmi Jashari, është në fundin e mandatit të tij. Dhe për këtë pozitë është mbyllur konkursi në të cilën garë është edhe Hasani.

Por kush është Enver Hasani?

Enver Hasani nga viti 2009 deri në vitin 2015 ka qenë kryetar i Gjyktës Kushtetuese.

Si kryetari i Gjykatës Kushtetuese Enver Hasani, në vitin 2014 ishte akuzuar për takime me zyrtarë të PDK-së pikërisht në kohën kur kjo parti politike kishte dërguar një lëndë në Kushtetuese me të cilën kontestohet zgjedhja e Isa Mustafës në postin e Kryetarit të Kuvendit të Kosovës. 

“Baba” dhe “njeri i PDK-së”, Enver Hasanin e pati quajtur edhe Lëvizja Vetëvendosje.

Përmes një aksioni simbolik në vitin 2014,  LVV pasqyronin sipas tyre  “kapjen e Gjykatës Kushtetuese nga SHIK-u dhe PDK-ja”.

Kjo parti para ndërtesës së Qeverisë së Kosovës, pati vendosur një kalë që mbante emrin e ish-kryetarit të Gjykatës Kushtetuese, Enver Hasani, e që tërhiqte “qerren” e PDK-së të cilën e drejtonin dy persona të maskuar me “kokat” e Hashim Thaçit dhe Kadri Veselit.

Sipas Vetëvendosjes, Asociacioni i Komunave Serbe, kapja e shtetit nga strukturat e SHIK-ut, marrëveshjet me Serbinë, thellimi i varfërisë dhe papunësisë, shkatërrimi dhe privatizimi i ndërmarrjeve publike, shkatërrimi dhe privatizimi i ndërmarrjeve shoqërore, fusnota si dhe “rehatimi” i dajave ishin barra që mbarte “qerrja” e PDK-së e tërhequr nga “Baba”, emër me të cilin ata personifikonin kryetarin e Gjykatës Kushtetuese, Enver Hasani.

Aktivisti i Lëvizjes Vetëvendosje në atë kohë, Frashër Krasniqi tha se “pushtetet në Kosovë, në vend që të jenë të ndara nga njëra tjetra, janë shumë të varura prej njëra tjetrës”.

“Në vend që ta kemi një Gjykatë Kushtetuese me integritet dhe pavarësi nga pushteti i kaluar, e kemi një Gjykatë Kushtetuese komplet të varur nga PDK-ja dhe SHIK-u. Në vend që ta kemi një Kryetar të denjë të Gjykatës Kushtetuese, e kemi Enver Hasanin, i cili është njeri i varur nga kryetari i PDK-së, Hashim Thaçi, dhe nga shefi i SHIK-ut, Kadri Veseli”, thoshte Krasniqi.

Në një rast tjetër në vitin 2014, Albin Kurti kishte nxitur të qeshura në njërin prej tubimeve të partisë së tij, në Prishtinë, kur kinse ngatërroi mbiemrin e Kryetarit të Gjykatës Kushtetuese të Kosovës, Enver Hasanit.

“Enver sahani, asi Enver Hasani”, pati thënë Kurti para anëtarëve të Vetëvendosjes.

Por, qendrimet e Vetëvendosjes ndaj Enver Hasanit ndyrshuan gjashtë vite pas.

Kur në mars të këtij viti Enver Hasani për rrëzimin e qeverisë së Albin Kurtit dha këtë deklaratë “mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë”, Kurti ndërroi qëndrimin ndaj tij.

Derisa dikur e quante “Kali i PDK-së” e “Enver Sahani” në reagimin e tij të parë si kryeministër në largim, Albin Kurti përdori pikërisht deklaratën e ish-kryetarit të Gjykatës Kushtetuese, Enver Hasanit.

Teksa sot në reagimin e tij Kurti e ka respektuar duke e quajtur profesor, Enver Hasani e jo “Kali i PDK-së” apo “Enver Sahani”, siç e quante në të kaluarën.

“Saktë e kishte thënë mbrëmë Prof. Enver Hasani: mosbesimi ishte koniuktural. Kur përfaqësimi demokratik bie në koniukturë politike, tjetërsimi bëhet normë”, ka shkruar Kurti në reagimin e tij.

Enver Hasani, përveç që ka qenë i akuzuar për afërsi politike, ka qenë i akuzuar nga prokuroria edhe për falsifikim dokumentesh, keqpërdorim të pozitës apo autoritetit zyrtar dhe mashtrim.

Në vitin 2016 Prokuroria Speciale e akuzonte Hasanin se sa ishte kryetar i Kushtetueses – me dashje, kishte shfrytëzuar në mënyrë të paligjshme pozitën zyrtare kur kishte vendosur të nxjerrë një aktvendim për papranueshmëri lidhur me një kërkesë të ish-presidentes Atifete Jahjaga, që kishte të bënte me emërimet e gjyqtarëve ndërkombëtar në Kushtetuese.

Hasani dyshohej se kishte shënuar të dhëna të rreme në një aktvendim për papranueshmërinë e asaj lëndë, duke e shënuar në faqen e parë të këtij aktvendimi edhe emrin e gjyqtarit Robert Carolan si pjesëmarrës në trajtimin e kësaj çështje kushtetuese. Por, Carolan nuk kishte marrë pjesë në trajtimin e kësaj çështje.

Si pasojë gjyqtarët kanë përfituar në mënyrë të kundërligjshme mandatet shtesë si gjyqtarë ndërkombëtar në Gjykatën Kushtetuese të Republikës së Kosovës. Hasani gjatë tërë procesit ishte thirrur në imunitetin funksional që sipas tij ai ka pasur si kryetar i gjykatës, por që ishte hedhur poshtë nga shkalla e parë. Rastin e fitoi në Supreme kur u shpall i pafajshëm për akuzat.

Por, ky nuk ishte rasti i vetëm që Enver Hasani përballej me drejtësinë.

Në korrik të vitit 2015, ai është akuzuar për mashtrim, pasi që dyshohej se sa ishte rektor i Universitetit të Prishtinës, kishte nënshkruar kontratë për përkthimin e librave në gjuhën shqipe në dëm të universitetit.

Sipas aktakuzës së prokurorisë, Hasani dhe dy zyrtarë tjetër të UP-së,  Hakif Veliu si shef i Zyrës së Prokurimit në UP dhe Albert Rakipi si drejtor i Institutit për Studime Ndërkombëtare (ISN), dyshohej se kanë falsifikuar kontratën origjinale “Përkthimi i Librave nga Gjuha Angleze në Gjuhën Shqipe për Nevojat e Universitetit të Prishtinës” të datës 5 dhjetor 2008.

Lidhur me këto akuza në aferën e njohur si “përkthimi i librave të UP-së”, Gjykata Themelore në Prishtinë në tetor të vitit 2017 e kishte dënuar Enver Hasanin me 1 vjet burgim me kusht. Por një vit më vonë Gjykata e Apelit, e hodhi poshtë vendimin e shkallës e parë, duke e liruar Hasanin nga akuzat për mashtrim.

Por pavarësisht të gjitha këtyre akuzave publike, Enver Hasani po synon të zgjidhet Avokat i Popullit, detyrë kjo që mund t`i jepet nga deputetet e Kuvendit, shkruan Gazeta Insajderi.