Shtabi i Përgjithshëm i UÇK-së në Hagë, lista e gjatë e të dyshuarve

Shtabi i Përgjithshëm i UÇK-së në Hagë, lista e gjatë e të dyshuarve

Emrave të krerëve kryesor të Ushtrisë Çlirimtare të Kosovës, që u ftuan nga Gjykata Speciale në Hagë, sot iu shtua edhe ish-komandanti i Shtabit të Përgjithshëm të UÇK-së  (gjatë muajve të fundit të luftës), Agim Çeku, shkruan Gazeta Insajderi.

Ai është ftuar në cilësinë e të dyshuarit nga prokurorët e Dhomave të Specializuara.

Kështu ka bërë sot të ditur kryetari i Organizatës së Veteranëve të Luftës OVL-UÇK, Hysni Gucati.

Por, Çeku është ndër të fundit emra të krerëve të UÇK-së që janë ftuar.

Një ‘tronditje’ e madhe për qytetarët e Kosovës, erdhi më 24 qershor të këtij viti, kur një aktakuzë prej dhjetë pikash ishte ngritur kundër presidentit të Kosovës Hashim Thaçi dhe kryetarit të Partisë Demokratike të Kosovë Kadri Veselit,  duke i akuzuar ata për krime që dyshohet se janë kryer në luftën e Kosovës.

Me publikimin e kësaj aktakuze Zyra e Prokurorit të Specializuar në Hagë kishte rënë në kundërshtim me komunikatën e mëhershme të saj në të cilën thotë se përmbajtja është konfidenciale.

Mirëpo në këtë rast, ishte vet kjo zyrë që publikoi këtë aktakuzë, teksa arsyetohej se e ka bërë me qëllim që t’i ndal përpjekjet e Thaçit dhe Veselit për sabotimin e punës së Gjykatës Speciale.

E gjithashtu, emrat e të akuzuarve të tjerë nuk u publikuan përpos të presidentit dhe të kryetarit të PDK-së.

Përveç kësaj, kjo aktakuzë u u publikua pas skadimit të Misionit të EULEX-it në Kosovë.

Gazeta Insajderi, pati mësuar nga burime brenda institucioneve të inteligjencës se ka dyshime se misioni i EULEX-it kishte përdorur mjete joligjore përmes ish-stafit të tyre, që tashmë janë pjesë e Zyrës së Prokurorit të Specializuar dhe Dhomave të Specializuara, që në mënyrë indirekte ta shantazhojnë presidentin Thaçi me aktakuzë të Gjykatës Speciale, në mënyrë që ky i fundit t’ia vazhdojë mandatin këtij misioni.

Megjithatë, ish-drejtori politik i UÇK-së Hashim Thaçi dhe ish-anëtari i Shtabit të Përgjithshëm të UÇK-së, Kadri Veseli, udhëtuan për në Hagë, për t’u intervistuar në cilësinë e të dyshuarve.

Intervistimi i presidentit Thaçi, zgjati katër ditë. Ai me t’u kthyer në Kosovë, u deklarua për media, duke thënë se historia e Kosovës nuk mund të rishkruhet dhe se ky proces nuk mund ta rishkruajë këtë histori.

Një ftesë në cilësinë e të dyshuarit për ‘krime lufte dhe krime kundër njerëzimit’  i erdhi edhe ish-komandanti të përgjithshëm të UÇK-së Azem Sylës. Ish-shefi i Ushtrisë Çlirimtare të Kosovës, pranoi ftesën dhe u intervistua nga Prokurorët e Dhomave të Specializuara, teksa nuk ka bërë asnjë deklaratë për media në lidhje me këtë.

Por ftesat për Shtabin e Përgjithshëm (ShP) të Ushtrisë Çlirimtare të Kosovës, nuk kanë pasur të ndalur.

Nga Dhomat e Specializuara në Hagë, është ftuar edhe ish-anëtari i këtij Shtabi dhe ish-zëdhënësit të UÇK-së, Jakup Krasniqi. Krasniqi nuk ka bërë të ditur se në çfarë cilësie është ftuar, mirëpo, ai është intervistuar nga prokurorët, dhe ka vendosur të mbrohet në heshtje.

Se në çfarë cilësie është ftuar, nuk e ka bërë të ditur as ish-anëtari tjetër i ShP të UÇK-së, Xhavit Haliti. Haliti, njëherësh edhe ish-deputet i Kosovës, ka marrë ftesë nga Gjykata Speciale nëntë muaj më parë.

Ish-anëtari i Shtabit të Përgjithshëm të Ushtrisë Çlirimtare të Kosovës, Rexhep Selimi, po ashtu ka marrë një ftesë të tillë për intervistë nga Gjykata Speciale. Ftesa për Selimin, ka ardhur në cilësinë e të dyshuarit.

Si të dyshuar janë ftuar edhe ish-anëtarët e ShP të UÇK-së, Sokol Bashota dhe Bislim Zyrapi. Që të dy i janë përgjigjur kësaj ftese dhe kanë kryer intervistimin nga prokurorët e dhomave të specializuara.

Ndërsa, ish-anëtari i ShP të UÇK-së, Lahi Brahimaj, ndonëse ka marrë ftesë nga kjo Gjykatë, nuk ka treguar se në çfarë cilësie është ftuar.

E ftesave të Gjykatës Speciale nuk i kanë shpëtuar as komandantët e Zonave Operative.

Një e tillë që bëri shumë bujë vitin e kaluar ishte për ish-komandantin e Dukagjinit, Ramush Haradinaj – asokohe kryeministër i Kosovës. Për shkak të kësaj ftese, ish-kryeministri Haradinaj, dha dorëheqje nga i pari i ekzekutivit, duke e dërguar kështu vendin në zgjedhje të parakohshme. Haradinaj, u ftua në cilësinë e të dyshuarit teksa vendosi të mbrohej në heshtje përballë prokurorëve të Speciales.

Ftesë morën edhe Komandantët e Zonës Operative të Drenicës, Sylejman Selimi dhe Sami Lushtaku. Asnjëri nga ta nuk treguan se në çfarë cilësie u kishte ardhur ftesa. Njëjtë ka vepruar edhe ish-komandati i Zonës Operative të Pashtrikut, Sadik Halitjaha, i cili po ashtu ka marrë një ftesë të tillë.

Ndërsa ish-komandanti i Llapit, Rrustem Mustafa ka marrë ftesë nga Gjykata Speciale, i pari nga të gjithë udhëheqësit dhe luftëtarët e UÇK-së. Ai nuk ka treguar në çfarë cilësie por që dihet se ka pranuar të flasë.  E në cilësinë e të dyshuarit ftesë nga Specialja ka marrë edhe Shukri Buja, ish-komandant i Zonës Operative të Nerodimes.

Thirrjes nga Haga, deri më sot, i kanë shpëtuar  komandanti i Zonës Operative të Pashtrikut, Fatmir Limaj, ai i Zonës Operative të Shalës, Rrahman Rama dhe ish-komandanti i Zonës Operative të Karadakut, Ahmet Isufi.

Kujtojmë se në fillim të janarit të vitit 2019-të, ka nisur punën Gjykata Speciale në Hagë që do të hetojë krimet e supozuara nga Ushtria Çlirimtare e Kosovës.

Gjykata Speciale e cila përbëhet nga Dhomat e Specializuara dhe Zyra e Specializuar e Prokurorisë e që e ka selinë e saj në Hagë, është themeluar me këmbëngulësinë e bashkësisë ndërkombëtare në vitin 2015, ku kuvendi i Kosovës miratoi ndryshimet kushtetuese për këtë Gjykatë.

Të gjithë gjykatësit dhe prokurorët e Gjykatës Speciale janë ndërkombëtar.

Ideja për themelimin e Gjykatës, pasoi hetimet e pretendimeve të të dërguarit të Këshillit të Evropës, Dick Martty, për përfshirjen e ish-drejtuesve të Ushtrisë Çlirimtare të Kosovës, në krime të luftës dhe të pasluftës në Kosovë. Që nga viti 2019 mbi 200 ish- pjesëtarë të Ushtrisë Çlirimtare të Kosovës janë marrë në pyetje nga prokurorët  e Prokurorisë së Specializuar. Në mesin e të intervistuarve nga Prokuroria Speciale si i dyshuar për krime lufte ishte edhe ish-kryeministri i Kosovës, Ramush Haradinaj./ Insajderi.org