Futbollisti i kombëtares shqiptare, Andi Lila, ka rrëfyer eksperiencën e tij në Kampionatin Evropian që u mbajt këtë vit në Francë. 

Një nga episodet më të veçantë të eksperiencës në Euro 2016 për Lilën mbetet dueli i tij me Paul Pogba-n në minuta e fundit të sfidës me Francën.

“Unë mbaja Martial-in, por në fund, te Franca u aktivizua Pogba. Ai është shumë i gjatë, një kokë më i gjatë se unë dhe në goditje këndi apo dënimi po të mos e mbaje me hile të shkëputej. Ndaj unë e kapja me duar si të mundja 2-3 herë, duke u munduar që të mos më shihte gjyqtari.”

“Ai thirri dy-tre herë por gjyqtari nuk e dëgjonte, pasi në Marsejë ishte rrëmujë, kishte shumë tifozë. Ndaj m’u kthye dhe më tha në anglisht ‘A je i çmendur?’.  ‘Po’ i thashë dhe u largova me shpejtësi”, tregoi duke qeshur Lila këtë episod të veçantë gjatë ndeshjes me “gjelat”.

Lila po ashtu u shpreh i zhgënjyer me rezultatet e ndeshjeve të tjera që nuk shkuan në favor të Shqipërisë. /Insajderi.com