Deputeti i VV-së, Dimal Basha ka thënë se marrëveshje me Serbinë për targat nuk do të arrihej nëse nuk do të ishte mbështetja e SHBA-së.

Basha tha se për dallim nga politika e jashtme e amerikanëve, BE-ja nuk e ka një politikë kaq të bashkuar.

“Unë personalisht nuk besoj që Kosova mundet me arrit marrëveshje me Serbinë pa e pasur SHBA-të që e japin shtytjen e fundit. Evropa nuk e ka një politik të bashkume. SHBA-të e kanë një politikë të jashtme, edhe te intervenimi, te ushtria e te shpallja e pavarësisë, kanë qenë amerikanët që ia qetë kapaun. Unë them se amerikanët prejnë sakicë”, tha Basha në Prime Time.

Ndryshe ambasadori i Shteteve të Bashkuara të Amerikës në Kosovë, Jeffrey Hovenier, ka thënë se vazhdimisht do të ketë një përpjekje të fuqishme të ShBA-së në dialogun ndërmjet Kosovës dhe Serbisë.

Ai ka theksuar se ajo që po mundohet të arrijë ShBA-ja është një gjenerim i një ambicie të gjatë të këtij projekti për një Evropë të plotë, të lirë dhe paqësore.