Kandidati për kryetar të Prishtinës, Daut Haradinaj, në debatin e organizuar me të gjithë kandidatët për Prishtinë shpalosi planin e tij për sistemin e mbledhjes së mbeturinave.

Haradinaj fillimisht ironizoi me kundërkandidatët, duke falënderuar ata për kopjimin e planit të tij për menaxhimin me sistemin e menaxhimit të mbeturinave.

Duke folur për planin e tij, Haradinaj tha se projekti i tij Eco – City përfshin sistemimin e të gjitha shërbimeve komunale të pastrimit, mirëmbajtjes dhe trajtimit të mbeturinave në një qark të integruar operativ.

Sipas Haradinajt, Qendra Operative Eco City do të kujdeset për planifikimin, mobilizimin, ekzekutimin dhe monitorimin e të gjitha aktiviteteve të ofruara brenda komunës.

Ndërkaq, menaxhimi i kontejnerëve të mbeturinave përfshin riorganizimin e shërbimit të grumbullimit mbeturinave për të gjitha lagjet e Prishtinës. Sipas Haradinajt, çdo kontejner mbeturinash do të skanohet, regjistrohet dhe të gjitha këto sinkronizohen me sistemin e bazës së të dhënave të EcoCity.

‘Çdo mjet i transportit do të jetë i pajisur me kompjuter, i cili do ta monitorojë lëvizjen dhe punën e automjetit dhe do t`i regjistrojë lëvizjet ditore. Me këtë veprim do të minimizohen shpenzimet e mirëmbajtjes dhe humbjet në qarkullim’, tregoi Haradinaj.