Janë deleguar gjyqtarët për xhiron e 31-të Superligës së Kosovës. As në këtë xhiro nuk do të jetë Genc Nuza që është gjyqtari më i mirë në vendin tonë, shkruan Insporti.com.

Vëmendja do të jetë në Suharekë, me Ballkanin si lider i ri nikoqir kundër Llapit që është afër të sigurojë mbetjen në elitë. Drita do të kërkojë këndelljen në Brestovik të Pejës kundër Besës e cila tashmë është ç’regjistruar nga Superliga.

Prishtina pas fitores së madhe në Gjilan ndaj Dritës, luan në “Fadil Vokrri” kundër Trepçës ’89. Gjilani e pret Drenicës, ndërkohë që Feronikeli dhe Arbëria luajnë në Drenas.

Tashmë janë deleguar edhe gjyqtarët për ndeshjet e javës së 31-të.

Kryendeshjen mes Ballkanit dhe Llapit do ta gjykojë Besfort Kasumi, kurse ndeshja Prishtina – Trepça ’89 i është besuar Dardan Çakës.