FC Prishtina është gati për sezonin e ri të Superligës së Kosvoës që do të nis të shtunën (nesër), më 13 gusht, shkruan Insajderi.

Ditë më parë Gazeta Online “Insajderi” raportoi se klubi bardh e kaltër ka zhbllokuar merkaton pasi ka kryer obligimet financiare që kishte ndaj disa futbollistëve, që tashmë nuk janë pjesë e klubit.

Me të zhbllokuar merkaton nga FIFA, Prishtina ka regjistruar të gjithë futbollsitët e transferuar.

Këtë e ka konfirmuar edhe drejtori i përgjithshëm i klubit, Artan Osmani, në një prononcim për Insajderin.

“Po tash e disa ditë kemi zhbllokuar merkaton dhe gjithë futbollistët janë regjistruar. Jemi gati për sezonin e ri”, ka deklaruar Osmani.

Klubi më i madh në futbollin e Kosovës javën e kaluar është bërë me bord të ri teknik dhe kryetar të ri të bordit.

Tashmë, Prishtina drejtohet nga Hakif Gashi i cili mori besimin e aksionarëve të klubit për ta drejtuar klubin.

Gashi ka premtuar se Prishtina do të këndellet financiarisht dhe se do të fillojnë reforma në klub.

Gashi në pozitën e drejtorit sportiv ka emëruar ish-futbollistin e Prishtinës, Driton Krasniqi.

Në tri sezonet e fundit klubi kryeqytetas është ballafaquar me probleme të mëdha financiare.

Këtë sezon skuadra do të udhëhiqet nga trajneri i njohur, Ismet Munishi, i cili do të jetë i lumtur pasi do të ketë gjithë futbollistët në dispozicion për sezonin e ri të Superligës i cili do të fillojë këtë fundjavë.

Prishtina nesër do të udhëtojë në Klinë për ta zhvilluar ndeshjen e parë të Superligës kundër Dukagjinit, me fillim të orës 17:00. /Insajderi/