Të martë mbrëma pas të shtënave me armë zjarri në lagjen Kodra e Trimave në Prishtinë mbetën të plagosur dy persona. Njëri nga të plagosurit është Leutrim Krasniqi. Sipas informacioneve të deritanishme, një veturë në lëvizje ka gjuajtur disa herë në drejtim të Krasniqit dhe viktimës tjetër dhe më pas kanë arritur të ikin.

Ndaj Leutrim Krasniqit është lëshuar urdhër për ndalim policor, pasi i njëjti e ka përdorur armën dhe ka shtënë me të në drejtim të të dyshuarve të tjerë.

Në vendin e ngjarjes janë gjetur mbi 20 gëzhoja, që janë sekuestruar bashkë më armën e të dyshuarit Krasniqi.

Por, kjo nuk është hera e parë që Krasniqi ka probleme me drejtësinë. Emri i tij është i njohur për organet e rendit, për shkak të të kaluarës së tij kriminale, të pasur me plot vepra penale.

Kush është Leutrim Krasniqi?

Leutrim Krasniqi është një 27-vjeçar, i cili edhe më parë ka qenë i arrestuar e ndaluar, si pasojë e veprave në të cilat është përfshirë, e madje ka qëndruar edhe në burg për një kohë.

Ndër rastet e fundit është incidenti që ndodhi në kafeterinë “Large Bar” në Prishtinë, në qershor të këtij viti, ku si pasojë e të shtënave me armë zjarri nga Krasniqi kishte mbetur i plagosur 33-vjeçari, Meriton Pajaziti.

Krasniqi kishte qëndruar në arrati për dy muaj me radhë dhe më pas në muajin gusht është dorëzuar në Polici. I njëjti ka qenë në kërkim, por njësitë policorë nuk kanë arritur ta arrestojnë derisa ai vendosi të paraqitet vetë.

Sinjali raporton se i riu dyshohet edhe për raste të tjera, të kësaj natyre, është hetuar për veprat penale “Lëndim i rëndë trupore”, “Armëmbajtje pa leje” dhe “Shkaktim i rrezikut të përgjithshëm”.