×
  • Lajme
  • Insajderi

    Ekskluzive: Kadri e Valon Shala gjenden në këtë shtet, vazhdojnë biznesin nga arratia

    Insajderi
    23 October 2020 - 22:19

    Kadri e Valon Shala, pronarët e kompanisë “LDA Group” Sh.P.K”, pas vjedhjes së 2 milionë e 77 mijë eurove nga Thesari i Shtetit, janë arratisur nga vendi. Ata dyshohet se ndodhen në Turqi.

    Madje, dyshja po e vazhdojnë punën edhe nga arratia.

    Kadri Shala, sot ka bërë porosi për beton në kompaninë “Euroaspahlt ShPK”, përmes një numri nga Turqia.

    Këtë për Insajderin e ka konfirmuar, njëri prej pronarëve të kompanisë “Euroaspahlt”, Granit Fetoshi, i cili ka konfirmuar se deri tani kanë pranuar 7 mijë e 250 nga kompania “LDA Group”.

    “A ke qu beton na kun!”, i ka thënë Kadri Shala punonjësit të kompanisë së betonit, derisa i përcjell një numër të një personi tjetër në Gjakovë, i cili e kryen shërbimin për kompaninë e Shalës.

    Fetoshi i ka dërguar bisedën Insajderit me Shalën, i cili porosinë sot ka bërë përmes platformës “WhatsApp”.

    “…Ne edhe sot i kemi quar beton këtij personi, por na nuk e kemi njohur. Ky person (Kadri Shala) e ka kryer porosinë përmes telefonit. Dhe fizikisht ka qenë para 2-3 jave, për me na bind qe mundemi me punu me ta, interesi jonë është me shit beton. Të gjitha pagesat i ka kryer me rregull, përveç kësaj të fundit që na ka mbetur borxh diku 800 euro”, ka treguar Fetoshi për Insajderin.

    Dy milionë e 77 mijë euro kishin kaluar nga Thesari i Shtetit përmes katër transaksioneve në llogarinë e kompanisë privat me bazë në Drenas, “LDA Group SHP”, me pronarë Kadri e Valon Shala.

    Vjedhja nga thesari ka ndodhur në kohën e pauzës së 9 tetorit dhjetë ditë para se të bëhej publik skandali.

    Transaksioni ilegal është kryer nga Labinot Gruda, zyrtar i Thesarit të Shtetit sipas Prokurorisë së Shtetit krejt ky proces ka ndodhur brenda 8 minutave.

    Gruda ndodhet në paraburgim kurse Kadri e Valon Shala në arrati.
    Pas pranimit të mbi 2 milionë euro në llogarinë bankare të “LDA Group ShPK”, pronarët e kësaj kompanie, Kadri e Valon Shala kanë kryer edhe 17 transfere tjera, siç ka mësuar Insajderi.

    Hulumtim i Gazetës Insajderi, hedhë dritë mbi një skemë të vjedhjes së shpërndarjes së mbi dy milionë euro nga Thesari i Shtetit. 

    Njëri prej 17 transaksioneve të kryera nga  firma “LDA Group” pas pranimit të 2 milionëshit të vjedhur nga Thesari i Shtetit, figuron se është dërguar edhe në kompaninë e betonit “Euroaspahalt SHPK”, me lokacion në Bishtazhin të Komunës së Gjakovës.

    “Euroasphalt” është e regjistruar në ARBK në vitin 2008. Kryetari i Bordit të Drejtorëve të kompanisë është Kaltrin Kryeziu, drejtor dhe agjent i regjistruar Fatos Deva dhe anëtar i bordit Alban Fetoshi./Insajderi.org

    Klikoni Këtu për t'u bërë pjesë e kanalit zyrtar të Gazetës Insajderi në Viber.
    OP-ED
    Nga Rubrika

    © 2016-2024 Gazeta Online Insajderi - Të gjitha të drejtat e rezervuara.

    Impressum

    Kontakt

    Trademark