Policia e Kosovës ka demantuar lajmin e shpërndarë nga gazeta e Serbisë “blic”, se një flamur i Serbisë është vendosur në kullën e vrojtimit në Koshare. Në fotot e bëra sot në këtë lokacion, shihet se flamuri serb nuk ndodhet në kullë dhe lajmi i shpërndarë nga mediat serbe cilësohet si i rremë. 

Këtë për Gazetën Insajderi e ka konfirmuar zëdhënësi i Policisë së Kosovës, Daut Hoxha.

Ai ka theksuar se njësitet kompetente janë tërë kohën në kontroll të zonës në fjalë.

Reagimi i plotë:

Lidhur me disa shkrime në median serbe “blic” por edhe në rrjete të ndryshme sociale, se gjoja një flamur i Serbisë është vendosur në kullën e vrojtimit në Koshare, ju konfirmojmë se Policia e Kosovës demanton shkrime të tilla që kanë për qëllim dezinformimin e qytetarëve dhe ju njoftoj se njesitet kompetente policore për menaxhimin dhe kontrollin kufitar të Republikës së Kosovës janë duke kryer detyrat dhe patrullimet e rregullta edhe në atë lokacion.
Sipas raportimeve aktuale nga njësitet policore kufitare dhe verifikimeve nga ai lokacion një lajm i till nuk është i vërtetë.

Policia e Kosovës mbetet e përkushtuar në ruajtjen e rendit dhe sigurisë së pergjithshme në vend, përfshirë edhe menaxhimin dhe kontrollin kufitar sipas mandatit të saj ligjor dhe kushtetues.

Në vijim po ju përcjellim edhe fotot nga lokacioni i apostrofuar te datës 13.06.2021.