Gentian Mezani ishte trajneri i parë, me të cilin skuadra e Gjilanit përjetoi aventurën e parë në garat evropiane.

Para dy vjetësh, si nënkampion, Gjilani siguronte daljen në ciklin eliminator të Ligës së Evropës, ku pati paraqitje të mira nën urdhrat e trajnerit vlonjat.

Por, më pas, Mezani ishte shkarkuar nga klubi gjilanas në fund të vitit 2020 për shkak të rezultateve të dobëta, dhe që prej atëherë ka qenë i papunë.

Megjithatë, 46-vjeçari pritet të rikthehet sërish nga edicioni i ardhshëm te Gjilani.

Burime të mirëinformuara kanë treguar ekskluzivisht për FrontOnline se Mezani do të emërohet drejtor sportiv te klubi nga Anamorava.

Kështu, vlonjati do ta zëvendësojë Rafet Prekazin në këtë detyrë pasi trajneri mitrovicas do të largohet.

Ndryshe, Mezani e drejtoi Gjilanin në 62 ndeshje si trajner duke pasur një mesatare prej 1.71 pikësh për ndeshje.

Më parë në karrierën e tij, Mezani ishte trajner te Luftëtari, Laçi dhe Flamurtari i Vlorës.