Talenti kosovar, Adnan Januzaj kërkon që trajneri i Mançester United, Joze Mourinho, të vendosë sa më shpejt për të ardhmen e tij.

Tabloidi anglez The Sun shkruan se Januzaj pritet të zhvillojë një takim me Mourinhon këtë javë dhe kërkesa e tij është: Ose të jetë pjesë e formacionit bazë, ose ai do të largohet nga klubi, transmeton Insajderi.

21-vjeçari me origjinë shqiptare u huazua sezonin e kaluar te Dortmundi, por u rikthye në janar të këtij viti. Januzaj numëron 50 prezenca me Mançester United, duke shënuar edhe 5 gola që nga viti 2013.

Ai nuk u grumbullua nga Belgjika për finalet e Evropianit “Francë 2016” dhe me Dortmudin luajti vetëm 6 ndeshje.

Januzaj është njëri nga futbollistët potencial për t’iu bashkuar përfaqësueses kosovare, e cila që nga muaji shtator do të nisë ndeshjet zyrtare kualifikuese të botërorit “Rusi 2018”.  /Insajderi.com