Qentë e shpëtimit vazhdojnë të punojnë pandërprerë në zonat e goditura nga tërmeti në pjesën juglindore të Turqisë si anëtarë thelbësorë të ekipeve të emergjencës.

Si shpëtimtarë të vërtetë, duke përdorur shqisat e tyre të mprehta dhe stërvitjen për t’u sjellë shpresë dhe rehati të prekurve nga tërmeti, ata ia kanë dalë të shpëtojnë shumë njerëz të ngecur nën rrënoja pasi një tërmet me magnitudë 7.7 goditi qarkun Pazarcık të provincës Kahramanmaraş.

Rreth nëntë orë më vonë, një tërmet me magnitudë 7.6 me qendër në Elbistan të Kahramanmaraşit tronditi rajonin, duke prekur disa provinca të tjera, duke përfshirë Adana, Adıyaman, Diyarbakır, Gaziantep, Hatay, Kilis, Malatya, Osmaniye dhe Şanlıurfa.

Köpük shpëton 6 jetë njerëzish

Ndërsa përpjekjet e kërkim-shpëtimit vazhdojnë në Malatya, ekipet arritën të shpëtojnë 60-vjeçaren Meral Nakır, e cila u gjet në katin e parë të një ndërtese gjashtë-katëshe me ndihmën e qenit të shpëtimit Köpük, i cili e shpëtoi atë 77 orë pas tërmetit.

Köpük punon së bashku me ekipet e Autoritetit të Menaxhimit të Fatkeqësive dhe Emergjencave (AFAD), duke i ndihmuar ata të kenë akses në zona të vështira në katastrofa.

Pasi Köpük reagoi ndaj tingullit, ekipet kontaktuan me Nakır, që ishte e bllokuar nën rrënoja. Pas pastrimit të kujdesshëm të mbeturinave për 20 orë, u hap një vrimë për të hyrë në vendin ku ajo ishte bllokuar. Pasi u transportua nga vullnetarët në një vend të sigurtë, ajo u dërgua në spital me ambulancë për trajtim mjekësor.

Ekipet që kryenin përpjekjet e kërkim-shpëtimit u përqafuan me njëri-tjetrin dhe derdhën lot pas shpëtimit dramatik. Ushtarët, policia, ekipet mjekësore, AFAD, zjarrfikësit dhe ekipet shëndetësore morën pjesë në kërkim-shpëtim.

Köpük, i cili udhëtoi nga Vani në Malatya me ekipin e AFAD-it për të ndihmuar viktimat e tërmetit, ka shpëtuar gjashtë persona, katër prej të cilëve u shpëtuan nga një ndërtesë e shkatërruar dy ditë më parë.

Qeni i gjuetisë ‘Alex’

Uğur Şahin një qytetar nga Malatya, i cili gjithashtu u godit nga tërmetet në Kahramanmaraş, mbështeti përpjekjet e kërkim-shpëtimit me qenin e tij të gjuetisë me emrin “Alex” në një ndërtesë që ndodhet në qendër të qytetit.

Şahin, i cili arriti të arratisej nga shtëpia e tij kur goditi tërmeti, mori gruan dhe fëmijët në një zonë të sigurt dhe më pas mori pjesë vullnetarisht në punën e shpëtimit të kryer në rrënojat e një pallati në rrugën “Tevfik Temelli” me disa të afërm të tij.

Së bashku me qenin e tij të gjuetisë Aleksin, i cili është me të për rreth gjashtë vjet tashmë, Şahin dhe të afërmit e tij vazhdojnë të ndihmojnë ekipet në shpimin dhe gërmimin e mbeturinave. Aleksi bëri pjesën e tij duke marrë aromat e viktimave të varrosura në betonin e shkërmoqur.

Ekipet ndjekin qentë në Adana

Përpjekjet e kërkim-shpëtimit vazhdojnë në një ndërtesë 14-katëshe në Adana, e cila u shemb pas tërmetit. Në përpjekjet e kryera nga tre ekipe të ndryshme, duke përfshirë një qen kërkim-shpëtimi, ekipet intensifikuan kërkimet në pikat e treguara nga qentë.

Falë shqisës së mprehtë të nuhatjes së qenit, ekipet vazhdojnë të shpëtojnë jetë gjatë gjithë kohës. Ndërkohë, familjarët e qytetarëve të ngujuar nën rrënoja shikojnë dhe luten në heshtje në margjina, ndërsa presin lajme të mira për të dashurit e tyre.

Qentë e famshëm të Meksikës

Ndërsa vendet anembanë globit dërgojnë ekipe shpëtimi në Turqi, Meksika ka dërguar qentë e tyre të shpëtimit shumë të trajnuar, së bashku me trajnerët e tyre, në Turqi për të ndihmuar në operacionet e shpëtimit në gjetjen e të mbijetuarve pas tërmetit shkatërrues të së hënës.

Të 16 qentë dhe trajnerët e tyre, të shoqëruar nga ekspertë të kërkim-shpëtimit nga ushtria dhe marina meksikane, anëtarë të Kryqit të Kuq dhe zyrtarë të Ministrisë së Jashtme, zbarkuan të martën në shtetin turk.

Qentë e kërkimit dhe shpëtimit të Meksikës janë bërë simbole të qëndrueshmërisë dhe forcës së vendit përballë tragjedisë, veçanërisht pas tërmetit të vitit 2017 në Mexico City që mori qindra jetë.

Një qen i famshëm nga ekipi meksikan i kërkimit dhe shpëtimit i quajtur Frida, një Labrador i verdhë, u bë i njohur për shpëtimin e 43 njerëzve para daljes në pension të saj në 2019-n./A2CNN