×
  • Lajme
  • Lajme

    Kritikët e Bashës brenda partisë kanë një mesazh të fuqishëm për të

    Insajderi
    28 June 2017 - 22:12

    Kritikët e Lulzim Bashës brenda Partisë demokratike, janë të pakënaqur me vendimin e tij për të ngrirë funksionet organizative.

    Në një deklaratë të publikuar në mbrëmje, e treta brenda dy ditësh, figurat e PD kërkojnë dorëheqjen e menjëhershme të zotit Basha dhe hapjen e një procesi transparent, të drejtë dhe të paanshëm zgjedhor brenda partisë.

    Ne deklaratë nismëtarët kanë sqaruar në 2 pika kryesore kërkesat e tyre. Dorëheqja e menjëhershme e kryetarit  Lulzim Basha, është kushti i parë për të shkruar drejt një procesi gjithëpërfshirës analize për të nxjerrë shkaqet e humbjes fatale dhe mungesës së mbi 200 mijë votave të demokratëve në zgjedhjet e 25 qershorit. Vendimi për vetëngrirje konsiderohet si një akt i pamoralshëm,  antistatutor dhe madje qesharak i zotit Basha për t’iu fshehur përgjegjësisë.

    Së dyti, thonë kritikët e tij, akti i shpalljes së hapjes së procesit të zgjedhjeve dhe analizave për zgjedhje nga ana e dy nën kryetarëve është uzurpim i kompetencave. I gjithë procesi nxirret që në fillim jashtë normave dhe përcaktimeve statutore duke e bërë atë jo transparent dhe të manipulueshëm, arsyetojnë nismëtarët kundër Bashës.

    Përmes kësaj deklarate kërkohet mbledhja e kryesisë, përfshi edhe mbledhjen e Këshillit Kombëtar, reflektimi i disfatës dhe organizimi i zgjedhjeve të lira dhe të ndershme brenda partisë. “Zgjedhjet e organizuara me urgjencë rrezikojnë përçarjen e PD-së dhe jo afirmimin e saj si forum i mendimit të lirë dhe bashkëpunues”, përfundon deklarata.

    Deklarata e plotë

    “Ne anëtarë përfaqësues politikë të dy deklaratave të djeshme që kërkuam dorëheqjen e kryetarit të Partisë Demokratike, Lulzim Basha, dhe hapjen e një procesi transparent, të drejtë dhe të paanshëm zgjedhor brenda partisë, nisur nga zhvillimet e fundit deklarojmë se:

    1-Vetëm dorëheqja e menjëhershme e kryetarit  Lulzim Basha, është kushti i parë për të shkruar drejt  një procesi gjithëpërfshirës analize për të nxjerrë shkaqet e humbjes fatale dhe mungesës së mbi 200 mijë votave të demokratëve në zgjedhjet e 25 qershorit. E konsiderojmë të pamoralshëm, antistatutor dhe të pambështetur në asnjë traditë europiane fshehjen e përgjegjësisë së kryetarit Basha, pas aktit qesharak të “vetëngrirjes”. Nuk ka asnjë nen të librit të rregullave të Partisë Demokratike, ku mbështetët vendimi i Lulzim Bashës, i cili flet për delegim të funksioneve organizative, që nuk ia atribuon statuti, tek dy nënkryetarët e tij.

    2-Akti i shpalljes së hapjes së procesit të zgjedhjeve dhe analizave për zgjedhje nga ana e dy nën kryetarëve (për habi mungon firma e Sekretarit të Përgjithshëm), është uzurpim i kompetencave që nuk ia atribuan Statuti as Kryetarit, as Nënkryetarëve apo Sekretarit të Përgjitshëm, por Kryesië së PD (Neni 40 pika 2)  si për datën e zgjedhjeve ashtu dhe të procedurave të zgjedhjeve e të Komisionit të Organizimit dhe Kontrollit të Operacioneve Elektorale (Neni 46 i Statutit). I gjithë procesi nxirret që në fillim jashtë normave dhe përcaktimeve statutore duke e bërë atë jo transparent dhe të manipulueshëm. Dorëheqja e kryetarit Lulzim Basha, është e vetmja mundësi për të ndërprerë procesin antistatutor mbi të cilin po organizohen zgjedhjet dhe për të  rikthyer besushmërinë jetike tek ai. Përndryshe Zoti Lulzim Basha mbetet përgjegjësi i vetëm i shkatërrimit përfundimtar të PD.
    Interesi eshte garantimi i gares se lire dhe te ndershme per te mundesuar bashkimin dhe jo percarjen e PD. Doreheqja kerkohet per kushte te barabarte gare per gjithe kandidatet. Ne perputhje me Statutin kerkohet mbledhja e kryesise qe te vendose per hapat e metejshem, perfshi mbledhjen e keshillit kombetar, reflektimin e disfates dhe organizimin e zgjedhjeve te lira dhe te ndershme. Zgjedhjet e organizuara me urgjence rrezikojne percarjen e PD dhe jo afirmimin e saj si forum i mendimit te lire dhe bashkepunuese”.

    Klikoni Këtu për t'u bërë pjesë e kanalit zyrtar të Gazetës Insajderi në Viber.
    OP-ED
    Nga Rubrika

    © 2016-2024 Gazeta Online Insajderi - Të gjitha të drejtat e rezervuara.

    Impressum

    Kontakt

    Trademark