Kryeministri i Kosovës, Albin Kurti, i ka thënë komandatit të KFOR-it, Angelo Michele Ristuccia, se objektet e komunës janë pronë e Republikës, dhe se Policia e Kosovës është angazhuar që kryetarëve të komunave veriore t’u mundësohet hyrja në vendin e punës prej nga ata duhet.

Kurti u takua mesditën e së premtes me komandantin e KFOR-it në objektin e Qeverisë, pas tensioneve në komunat veriore.

“Liria e lëvizjes, sundimi i ligjit, siguria dhe mbrojtja, për të gjithë qytetarët, pa dallim bindjeve politike a prejardhjes, përkatësisë etni​ke apo fetare, në Republikën e Kosovës është prioritet dhe interes i të gjithëve. Institucionet e sigurisë duhet të bashkëpunojnë që të garantojnë një ambient të sigurt e të qetë për të gjithë. Kryeministri Kurti theksoi se kryetarët e komunave, të zgjedhur nga zgjedhjet e lira dhe demokratike, duhet t’i ushtrojnë detyrat dhe përgjegjësitë e tyre, për të ofruar shërbime publike cilësore për të gjithë qytetarët, pa pengesa”, thuhet në njoftimin e Kryeministrisë.

“Kurti e njoftoi komandantin Ristuccia se Policia e Kosovës është angazhuar që sipas detyrës zyrtare t’ua mundësojë këtyre kryetarëve hyrjen në vendin e tyre të punës prej nga ata duhet dhe do t’ju shërbejnë të gjithë qytetarëve pa dallim e pa diskriminim. Kryeministri theksoi se objektet e komunës janë pronë e Republikës”, vijon njoftimi.