Kandidati për kryeministër nga Lëvizja Vetëvendosje, Albin Kurti ka marrë pjesë në “Prishtina Lexon” që organizohet në kryeqytet për nderi të 1 qershorit Ditës Ndërkombëtare të Fëmijëve.

Kurti me këtë rast ua ka lexuar fëmijëve tregimin e “Lulit të Vocërr” ku sipas tij për fat të keq ende tingëllon aktual.

“Fëmijëve të pranishëm ua lexova tregimin “Luli i Vocërr”, nga Migjeni që për fatin tonë të keq tingëllon ende aktual. Që të gjithë fëmijët kanë të drejtë të jenë të lumtur në Një Qershor e në ditët e tjera të vitit, por jo të gjithë kanë mundësinë ekonomike që ta realizojnë këtë të drejtë”, ka thënë Kurti.

Kurti përmes një postimi në Facebook ka treguar edhe për këshillën e tij që ua ka bërë fëmijëve.

“Ndaj fëmijët e kryeqytetit i këshillova se nëse i kanë dy mollë, ta ndajnë një për vete e një për shokun ose shoqen. E nëse e kanë veç një, ta ndajnë gjysmën për vete gjysmën për shokun a shoqen”, ishte porosia e Kurtit./Insajderi.com