Në një konferencë për media që u mbajt gjatë ditës së djeshme, Manifesta 14 Prishtina shpalosi rezultatet kryesore nga anketa e pavarur publike, një studim i realizuar nga Instituti GAP dhe UBO Consulting që shqyrtoi aspekte të ndryshme të efektit të bienales në Prishtinë.

E gjetura më e dukshme e raportit ishte ndikimi ekonomik. Bienalja gjeneroi një vlerë ekonomike mbresëlënëse prej 20.2 milionë euro, me një kthim të jashtëzakonshëm në investim që është katër herë më i madh se shpenzimet publike. Kjo tregon fuqinë e jashtëzakonshme të artit dhe kulturës për të krijuar mundësi për rritje si dhe fuqinë e tyre transformuese të perceptimeve ndërkombëtare për Kosovën.

Ministri Hajrulla Çeku foli për ndikimin socio-ekonomik dhe atë kulturor që ka ardhur si rezultat i organizimit të Manifesta 14 Prishtina në vendin tonë dhe rëndësinë e investimit në ngjarje të tilla.

Drejtoresha e Manifesta 14, Hedwig Fijen, dhe Kryetari i Komunës së Prishtinës, Përparim Rama, gjatë prezantimeve të tyre treguan se trashëgimia e Manifesta 14 do të qëndrojë në Qendrën për Praktikë Narrative. Ky institucion kulturor, i menaxhuar nga profesionistë të talentuar, shërben si vend krijimtarie në zemër të Prishtinës.