Ambasadori i SHBA-së në Kosovë Jeff Hovenier, ka reaguar pas arritjes së pajtueshmërisë në mes kryeministrit Kurti dhe presidentit serb Vuçiq që ta implementojnë zbatimin e marrëveshjes së dakorduar më 27 shkurt në Bruksel.

Përmes një postimi në Twitter, ambasadori Hovenier e ka quajtur marrëveshjen të rëndësishme, duke u shprehur se SHBA ofron mbështetje të plotë për implementimin e saj.

“Është arritur marrëveshje e rëndësishme. Shtetet e Bashkuara do të ofrojnë mbështetje të plotë për zbatimin e këtyre detyrimeve në përputhje me përpjekjet tona afatgjata për të avancuar sigurinë, stabilitetin dhe prosperitetin për popullin e Kosovës dhe të rajonit”, thuhet në reagimin e tij.