Kur “Dosja e Shefave” përmes audioincizimeve kishte shpërfaqur haptas Adem Grabovcin si të inkriminuar në shumë skandale si emërime politike në pozita publike e punësime partiake, kryeprokrokurori Imer Beka, kishte dalë haptas në mbrojtje të Grabovcit, që atë kohë ishte shef i Grupit Parlamentar të PDK-së.

Ai kishte insistuar se Prokuroria nuk do të duhej të zhvillonte hetime ndaj Grabovcit, duke u përzier edhe në pavarësinë e Gjykatës.

Kishte thënë se Gjykata nuk është dashur ta hedhë poshtë kërkesën e Grabovcit për ndalimin e publikimeve të përgjimeve nga Insajderi.

Katër muaj më vonë, Beka është rizgjedhur në të njëjtën pozitë,

Kësisoj përkrahësi kryesor i Adem Grabovcit në sistemin Prokurorial, do të vazhdojë të qëndrojë në postin e kryeprokurorit të Prokurorisë së Prishtinës.

Qëndrimet e Bekës, për kryetarin e Gjykatës Themelore të Prishtinës, Hamdi Ibrahimi, ishin të mjaftueshme për të kërkuar nga Këshilli Prokurorial që të hetojë ndërhyrjen e kryeprokurorit të Prishtinës, Imer Beka në pavarësinë e gjyqësorit.

Blerim Isufaj, kryesues i Këshillit Prokurorial, kishte refuzuar ta dërgojë kërkesën ish-kryetarit të atëhershëm Ibrahimi, në Zyrën e Diciplinore të Prokurorisë.

Përpos ndërhyrjes në rastin e Grabovcit, kryeprokurori ishte përfshirë edhe në mbylljen e hetimeve për vrasjen e Dafina Zhubit, një qytetare që zyrtarisht cilësohet të ketë bërë vetvrasje.

Ajo kishte vdekur në banesën e Astrit Dibrës në lagjen “Emshir” në Prishtinë. Ishte gjetur e shtrirë në shtratin e dhomës pa shenja jete. Një plumb kishte shpuar kokën e saj. Dibra kishte thënë se kishte qenë në dhomën tjetër kur kishte dëgjuar të shtënën.

Prokurorja Fitore Sadikaj, e cila kishte mbyllur hetimet kishte thënë se  vendimin për mbyllje hetimesh e ka marrë bazuar në konsultimin me kryeprokurorin e Prishtinës, Imer Beka.

Insajderi kishte sjellë fakte se i pandehuri ka lidhje të forta në Prokurori./Insajderi.com

Ndikimi i kryeprokurorit që vdekja e dyshimtë të cilësohet vetëvrasje e jo vrasje