Ka ditë që Lëvizja Vetëvendosje është duke kundërshtuar mediat në Kosovë, me arsyetimin se të njëjtat janë duke shpërndarë lajme të rrejshme.

Por, vetë partia e cila ende s’i ka bërë një muaj që nga marrja e pushtetit, ka disa grupe dhe faqe në të cilat publikohen vetëm të “vërtetat” që Lëvizja do.

Grupi meKryeminsitrin i cili ka 329 mijë anëtarë – shpesh ka publikuar lajme të pavërteta për personat që ata i konsiderojnë “armiq” të Albin Kurtit dhe Vetëvendosje.

Mbështetësit e Vetëvendosjes e mbajnë edhe portalin mekryeminsitrin.info, në të cilin publikohen lajmet që flasin për “sukseset e Albin Kurtit dhe të kabinetit të tij”, ndërsa kundërshtohen të gjithë ata që mendojnë ndryshe nga lideri.

Partia që tani udhëheqë me shtetin e ka edhe televizionin e saj. Aty paraqitën herë pas herë zyrtarët e lartë të partisë dhe flasin për gjërat që ata dëshirojnë në bazë të pyetjeve që përgatiten po nga mbështetësit e tyre.

Në pak ditë pushtet, gazetarët kanë marrë shumë pak përgjigje në pyetjet që kanë dërguar tek ministrat dhe zyra e Kryeministrit.

Qeveria e udhëhequr nga Albin Kurti ka kthyer përgjigje vetëm në pyetjet që i kanë konvenuar.

Pavarësisht këtyre, ministri i Shëndetësisë, Arben Vitia, e mori guximin dhe tha se Insajderi ka publikuar një lajm krejtësisht të pavërtetë.

“Lajmi i publikuar në Gazetën Insajderi, është i pavërtetë i dëmshëm dhe dashakeq. Më lejoni ta rithekësoj edhe një herë: lajmi i publikuar në Gazetën Insajderi, është i pavërtetë i dëmshëm dhe dashakeq”.

Kështu tha Arben Vitia, ministri Shëndetësisë, natën e 16 prillit, pak orë pas publikimit të hulumtimit të Insajderit që mban titullin: “Arben Vitia nuk e nënshkruan kontratën me Pfizer dhe BioNtech, rrezikon jetën e mijëra kosovarëve”.

Vitia s’e tha asnjë fakt në kundërshtim të shkrimit i cili flet për neglizhencën e tij për të mos e nënshkruar udhëzimin administrativ që i hap rrugë blerjes së 500 mijë vaksinave nga Pfizer.

Megjithatë, ministri Vitia njoftoi të dielen se e ka nënshkruar udhëzimin administrative, veprim ky të cilin e bëri vetëm dy ditë pas publikimit të hulumtimit të Insajderit./GazetaInsajderi/