Vendime të falsifikuara për subvencione është duke prodhuar Agjencia për Zhvillimin e Bujqësisë.

Të tilla që ka siguruar “Koha Ditore” janë lëshuar në shtator dhe mbajnë nënshkrimin e Elhami Hajdarit, kryeshef i Agjencisë, i cili prej muajsh është i suspenduar dhe nuk ndodhet në zyre, shkruan sot Koha Ditore.

Edhe muajve paraprak, por edhe gjatë shtatorit, Hajdari nuk ka mundur ta ushtrojë funksionin. Kjo, pavarësisht faktit se edhe Gjykata Themelore në Prishtinë, nëpërmjet një aktvendimi, u ka dhënë vulë pohimeve se ishin të paqena “faktet” që i kishte listuar ministri i Bujqësisë, Nenad Rikalo, si arsye për ta larguar atë nga pozita e kryeshefit.

Gazeta ka raportuar më herët se Hajdari është ndëshkuar pasi kishte refuzuar t’ia përcillte jashtëligjshëm mbi 80 mijë euro një biznesi me bazë në Prizren, me të cilin kishte raport afarist Biljana Rikalo, bashkëshorte e këtij ministri serb.