Të mërkurën Gjykata Themelore në Prishtinë ua ka caktuar një muaj paraburgim katër të arrestuarve që po dyshohet se kanë funksionuar si një Grup Kriminal.
Për caktimin e paraburgimit nga gjykata, është ankuar njëri nga avokatët e të dyshuarëve.
Shqipron Zymeri, avokat i Hysni Hoxhës ka thënë për Insajderin se ky vendim nuk ishte i drejtë.
“Aktvendimi i atakuar është rezultat i shkeljes se dispozitave të procedurës penale të cilat e përcaktojnë bazën e caktimit të masës së paraburgimit si dhe rezultat i mungesës së vlerësimit të drejtë dhe të gjithanshëm të fakteve dhe rrethanave me rastin e konstatimit të ekzistimin e arsyeve ligjore për caktimin e paraburgimit”, ka deklaruar Zymeri.
Ai ka theksuar se kërkesa e Prokurorisë Themelore ka qenë e mangët dhe nuk është mbështetur në asnjë provë.
“Po ashtu aktvendimi është i bazuar ne kërkesën e Prokurorisë Themelore ne Prishtine – Departamenti i Krimeve të Rënda më numër të kërkesës PP/I.nr.872/2022 te datës 24.01.2023, e cila ne tërësinë e saje është e mangët dhe nuk mbeshtetet në asnjë provë dhe vetëm supozohet që ka dyshim të bazuar”, ka shtuar avokati i Hoxhës.
Driton Sylejmani, Xhevdet Mehanja, Hysni Hoxha dhe Tefik Shalaku po dyshohet se kanë kryer vepra të ndryshme penale si vrasje në tentativë, detyrim, lëndim i rëndë trupor, zjarrvënie dhe armëmbajtje. /Insajderi