Liderit të burgosur opozitar rus Alexei Navalny i është ndarë Çmimi Sakharov, i dhënë çdo vit nga Parlamenti Evropian (PE) në fushën e të drejtave të njeriut dhe lirisë së mendimit. Nënpresidentja e PE-së, Heidi Hautala, njoftoi se çmimi u nda për Navalny-n në seancën e mbajtur në Strasburg.
“Ai ka bërë fushatë të vazhdueshme kundër korrupsionit të regjimit të Vladimir Putinit dhe ka ndihmuar në zbulimin e abuzimeve përmes llogarive të tij në mediat sociale dhe fushatave politike. Ai ka mbështetjen e miliona njerëzve në gjithë Rusinë. Ai u helmua dhe u burgos për këtë”, ka thënë presidenti i PE-së David Sassoli në një deklaratë.
Gjithashtu, Sassoli tha se BE-ja vlerëson “guximin e madh personal” të Navalny-t dhe bëri thirrje për lirimin e menjëhershëm të tij. Këtë vit, 12 persona, përfshirë Navalny-n dhe tetë gra afgane, u nominuan për çmimin.
Ceremonia e ndarjes së çmimeve pritet të mbahet më 15 dhjetor. Çmimi Sakharov ndahet çdo vit nga PE-ja në emër të fizikanit disident sovjetik Andrei Sakharov, për individë dhe organizata që mbrojnë të drejtat e njeriut dhe liritë themelore.