Përparim Rama është arkitekt dhe urbanist i njohur shqiptar, i cili është vlerësuar me çmime ndërkombëtare.

Në vitin 1992, kur Përparim Rama ishte vetëm 16 vjeç u shpërngul në Britani të Madhe. Atje përfundoi studimet bachelor dhe master në degën e arkitekturës. Rama ka përvojë mbi 20 vjet në projekte të ndryshme arkitekturore në shumë vende të botës.

Edhe pse i përmbushur në karrierën e tij, ai vendosi të kandidojë për Kryetar të komunës së Prishtinës.

Gjithë planin e tij ai e mbështetë në tri pika krysore: Prishtina e Pastër, Prishtina Praktike, Prishtina e Përjetimeve.

Ai gjatë fushatës së tij një mujore duke u mbështetur në këto pika, Rama ka shpalosur disa nga projektet që do ta transformojnë Prishtinën.

Kandidati për kryetar të kryeqytetit nga Lidhja Demokratike e Kosovës ka premtuar se nëse e merr fronin do ta ndërtojë Unazën e Mesme të Prishtinës

“Do ta ndërtojmë Unazën e Mesme të Prishtinës, respektivisht segmentin nga rruga e Veternikut te Zona Industriale e deri te Qendra e Panaireve, për të mundësuar integrim dhe qasje në qytet, e cila do ta lirojë trafikun e brendshëm dhe do të mundësoje krijimin e vendeve të punës dhe të zhvillimit ekonomik të qytetit”, ka thënë Rama.

Përpos kësaj, Rama ka premtuar se do të ndërtoj edhe objekte të reja shkollore, në secilën lagje që mungojnë.

“Sipas analizave tona, aktualisht mungojnë shtatë objekte shkollore të nivelit të arsimit fillor dhe të mesëm të ulët”, ka thënë Rama.

Pretendenti për Prishtinën, ka thënë se kryeqyteti do të jetë qendër rajonale e artit, dhe kulturës.

“Me mua Prishtina do të jetë qendër rajonale e artit, kulturës dhe kreativitetit, sepse e di që e ka një potencial të tillë. Për të arritur këtë, unë do të mbështes industrinë e artit, muzikës, dhe të modës”, ka thënë ai.

Këto janë vetëm disa nga projektet e Ramës. Megjithatë ai është kujdesur që në një video të shkurtër t’i përmbledh projektet e tij kryesore për transformimin e Prishtinës.