Raportohet se synimi ka qenë për ta vrarë atë. Ish-kryeministri i Pakistanit, Imran Khan, është qëlluar dhe plagosur gjatë një marshimi protestues në qytetin Wazirabad.

Anëtarët e partisë së tij PTI thanë se katër persona të tjerë u plagosën të enjten – por askush nuk u vra, raporton BBC.

Nuk ishte e qartë nëse ai ishte goditur në shputë apo në këmbë. Megjithatë, një ndihmës u citua të thoshte se ai nuk ishte në rrezik, transmeton Klankosova.tv.

Khan, 70-vjeç, po drejtonte marshimin në kryeqytetin Islamabad për të kërkuar zgjedhje të parakohshme pasi ai u rrëzua nga pushteti.

Një ndihmës i lartë i tha agjencisë së lajmeve AFP: “Kjo ishte një përpjekje për ta vrarë atë, për ta eliminuar”. Një i dyshuar mashkull u arrestua më vonë, sipas “Geo TV” të Pakistanit.

Muajin e kaluar, komisioni zgjedhor i Pakistanit e diskualifikoi Khanin nga mbajtja e posteve publike. Këtë rast ai e përshkroi si të motivuar politikisht.

Ai ishte akuzuar se kishte deklaruar gabimisht detajet e dhuratave nga personalitete të huaja dhe të ardhurave nga shitja e tyre e pretenduar. Dhuratat përfshinin ora Rolex, një unazë dhe një palë manshete.