Një mjet shpërthyes është hedhur mbrëmë rreth orës 22:40 në objektin e elektro-distribucionit në veri të Mitrovicës.
Lajmi për Insajderin e ka konfirmuar zëvendësdrejtori i Policisë për rajonin e Mitrovicës së veriut, Besim Hoti.
Hoti ka bërë të ditur se përveç dëmeve materiale nuk ka të lënduar.
Mediumi lokal Kossev shkruan se si pasojë e sulmit është ndalur edhe rryma për një kohë në këtë pjesë të vendit.
Ky sulm vjen disa ditë pasi Kosova dhe Serbia nënshkruan një marrëveshje në sektorin e energjisë, apo më saktësisht një udhërrëfyes për zbatimin e marrëveshjeve të arritura gjatë vitit 2013 dhe 2015 në këtë fushë, ku njëra nga pikat detyronte ZRRE-në që t’ia lëshojë licencën furnizimi Elektroseverit.
Kjo licencë pritet të shqyrtohet sot nga ZRRE-ja.