Prindon Sadriu, ka reaguar ndaj deputetes së Aleancës për Ardhmërinë e Kosovës, Time Kadrijaj, e cila tha se ai rrin në Prishtinë, e paguhet si konsull në Shkup.

Sadriu ka paralajmëruar padi për shpifje ndaj deputetes së AAK-së, duke thënë se nuk ka qenë kurrë, e as nuk është konsull.

“Znj. Time Kadrijaj do të paditet për shpifje. Unë nuk jam, dhe as nuk kam qenë ndonjëherë Konsull, I përkas grupit të gjashtë diplomatëve të parë të karrierës në MPJ të punësuar përmes konkursit në vitin 2008 — shumë vite para se të njihesha me Vjosën”, ka shkruar Sadriu në rrjetin social Facebook.

Ai me tutje ka thënë se ajo si kryetare e Komisionit për Punë të Jashtme do duhej ta dinte se U.D e presidentes nuk emëron as shkarkon diplomatë të nivelit të tij, por vetëm shefa të misioneve.

“Si Kryetare e Komisionit për Punë të Jashtme duhet ta dini se Presidentja u.d., nuk emëron e as shkarkon diplomatë të nivelit tim, por vetëm Shefa të misioneve. Për fat të keq ju, dhe të tjerët si ju – ma keni mohuar mundësinë për të qenë Shef Misioni sepse nuk ju ka interesuar profesionalizmi në shërbimin e jashtëm”.

“Duke përfshi përvojën në Kuvendin e Shqipërisë dhe Kongresin Amerikan kam gjithsejë 14 vite përvojë relevante në fushën e marrëdhënieve me jashtë, ndërsa 16 vite përvojë pune profesionale”, ka shkruar me tutje ai. /Insajderi.org