Regjisori britanik Danny Boyle, fitues i çmimit Oscar në kinematografi, beson se dalja e Britanisë së Madhe nga Bashkimi Evropian do të çojë në shpërbërjen e Mbretërisë së Bashkuar .

“Mendoj se njerëzit kanë nisur të kuptojnë se çfarë hapi i madh është bërë,” u shpreh regjizori i filmit “Slumdog Millionaire” për agjencinë gjermane të lajmeve DPA.

“Besoj se nëse do të mund të votonin sërish, atëherë britanikët do të kërkonin të mbeteshin pjesë e BE-së,” tha ai.

Boyle i bëri këto komente gjatë Festivalit të Filmit në Berlin, ku u shfaq vazhdimi i njërit prej filmave të tij më të arrirë, “Trainspotting”, 20 vjet pas transmetimit të versionit origjinal të këtij realizimi.

Ai beson se me mbajtjen e referendumit për daljen nga BE-ja qershorin e kaluar, klasa politike e Britanisë së Madhe e kishte tradhtuar vendin, pasi politikanët nuk u shpjeguan njerëzve se sa e dobishme është Evropa.