Shefi i grupit parlementar i Lëvizjes Vetëvendosje, Rexhep Selimi, ka mohuar se ka pranuar telefonatë nga Albin Kurti, në 22 dhjetorin e 2018-ës, për të ndryshuar qëndrimin për votimin e shfuqizimit të Gjykatës Speciale.

Rexhep Selimi ndërsa ka komentuar deklaratat e ish-bashkë partiakut të tij, në Rubikon të Klan Kosovës, tha se Dardan Molliqaj ishte i paqartë në atë se çfarë kishte thënë.

“Nuk është fort e lehtë të komentojë këto që i paska thënë Dardan Molliqaj këtu”.

“Po aq sa nuk është e lehtë edhe ta kuptoj se s’ishte shumë i qartë, siç s’ishte i qartë edhe çfarë na patë ardhë atë natë, në atë kohë për të votuar”.

“Duket që ky [Dardan Molliqaj] më tepër u mundua ta shpjegojë problemin që ka kundrejtë figurës së Albin Kurtit, sesa nga Gjykata Speciale”.

“Prandaj s’po më jep mundësi për me komentu po aq sa s’la mundësi me e kuptu”.

“Nuk e di a ka qenë në burg apo jo atëherë Albin Kurti por nuk ndryshohet kjo me një telefonatë – as nuk ka kërkuar të votohet, as të mos votohet”.

“Nuk e kemi pasur temë!”, është shprehur Selimi për telefonatën që pretendohet se e bëri Kurti drejt tij.

Kryetari i PSD-së, Dardan Molliqaj të martën pohoi se deputeti Rexhep Selimi kishte garantuar votën e tij për ta shfuqizuar Gjykatën Speciale.

Porse sipas tij, një qëndrim të tillë, e pati ndërruar Albin Kurti me një telefonatë nga burgu.