Presidentja e Kosoëvs, Vjosa Osmani, ka marrë vendim për shkarkimin e Kryetares së KQZ-së, Valdete Daka.
Në arsyetim të vendimit të saj, Presidentja Osmani ka thënë se Daka ka lejuar votimin e qytetarëve me dokumente me afat të skaduar.
Por, Presidentja Osmani duket se nuk i ka pasur të gjitha informatat.
Gazeta Insajderi ka siguruar votimin që është zhvilluar përmes e-mailit ditën e zgjedhjeve, me 14 shkurt 2021, pak pas mesditës.
Sipas votimit përmes e-mailit, vetëm Kryetarja e KQZ-së ka qenë kundër që të lejohet votimi me dokumente me afat të skaduar. Ajo e ka kundërshtuar propozimin që ka ardhur nga përfaqësuesi i VV-së në KQZ, Sami Kurteshi.
“Meqenëse ky propozim është në kundërshtim me ligjin për zgjedhjet e përgjithshme, respektivisht të nenit 90, unë nuk e mbështes këtë propozim”, kishe shkruar Daka.
Propozimi i anëtarit të VV-së në KQZ, Sami Kurteshit, ishte që t’u mundësohet votimi i qytetarëve me dokumente të skaduar sepse ankesat janë të konsiderueshme.
Në fund, ka qenë anëtari tjetër i VV-së në KQZ që ka bërë bilancin e votimit, duke renditur 8 anëtarët që ishin për lejimin për të votuar edhe qytetarët me dokumente të skaduara.
Megjithë këto, Komisioni Qendror i Zgjedhjeve kishte vendosur që të lejojë të votojnë qytetarët, të cilët kanë letërnjoftim të Kosovës me afat të skaduar.
“Sapo i kemi njoftuar Komisionet Komunale të Zgjedhjeve se KQZ ka marrë vendim për lejimin e votuesve që të votojnë me letërnjoftime me afat të skaduar dhe të cilët figurojnë në listat përfundimtare të votuesve”, pati thënë zëdhënësi i KQZ-së, Valmir Elezi.
Në zgjedhjet e parakohshme parlamentare të 14 shkurtit, të drejtë vote kanë pasur 1 milion e 794 mijë e 862 qytetarë./Gazeta Insajderi