Edicionit 2021/22 në Superligën e Kosovës në futboll i vije fundi ditën e sotme me pesë ndeshjet përmbyllëse që përcaktojnë nënkampionin dhe ekipin e barazhit.

Tanimë dihet kampion i Superligës për këtë sezon është Ballkani, që e fiton këtë titull për herë të parë në histori të klubit.

Gjithashtu dihet edhe skuadrat që do të luajnë në Evropë si Drita, Gjilani e Llapi.

Dy skuadrat që bien direkt nga elita e futbollit kosovar janë Feronikeli nga vendi i fundit dhe Ulpiana e parafundit.

Ndërkohë sfidë e madhe po luhet për t’iu shmangur pozitës së tetë, pozitë që e dërgon skuadrën që mbetet aty në fund në barazh.

Malisheva dhe Dukagjini po përballen në stadiumin Liman Gega në Malishevë, ku dy skuadrat kërkojnë shpëtimin.

Vendasve iu kryen punë vetëm fitorja për t’i ikur pozitës së tetë, derisa mysafirët do të jenë të kënaqur edhe me barazim.

Drenica që ndodhet për momentin në pozitën e tetë ka punë më të lehtë, pasi luan përballë Feronikelit tanimë të rënë.

Edhe Prishtina nuk ka asgjë të sigurt dhe synon fitoren në udhëtim te Llapi për t’iu shmangur barazhit.

Ndeshje shumë interesante, por edhe festë pritet të zhvillohet në Suharekë. Ballkani pret Gjilanin ku synon ta mbyllë kampionatin me fitore, derisa mysafirët duan fitoren për pozitën e dytë.

Ndeshja e fundit, por jo nga rëndësia po zhvillohet në Gjilan mes Dritës dhe Ulpianës.