E mërkura e 31 marsit ka shënuar mbylljen e garës për “Albanian ICT Awards” ku kanë aplikuar rreth 100 kandidatë nga të gjitha vendet shqipfolëse.

Më 2 Prill, në Tiranë, juria e “Albanian ICT Awards” e përbërë prej 11 anëtarësh, profesionistë të respektuar si Altin Petre, Gjergji Spaho, Visar Jasiqi, Redi Neziri, Anni Dasho Sharko, Elvis Bregu, Ilir Çapuni e të tjerë, do të mblidhet për të vlerësuar nga shumë aspekte idetë e arkitektëve të së nesërmes.

Sipas një komunikate të dërguar nga ICTS Media, ekipi organizativ i Albanian ICT Awards zgjoi kreativitetin e të rinjve dixhitalë duke u premtuar një rol të munguar në shoqërinë shqiptare, atë të lokomotivës së inovacionit në sektorin e teknologjisë së informacionit.

“Me një mozaik pjesëmarrësish si ekspertë të IT-së, profesorë universitetesh, studentë, sipërmarrës, artistë, dizajner, takimet në kuadër të këtij konkursi mbarëkombëtar vijuan një maratonë të vërtetë gjatë muajit Mars. Kjo maratonë startoi të enjten e datës 4 Shkurt kur Albanian ICT Awards, në Tiranë dhe Prishtinë, çeli edicionin e katërt të garës mbarëkombëtare, tashmë tradicionale”, thuhet në komunikatë.

Projektet inovative do të ndahen në shtatë kategori ku secili prej tyre adreson një nga sfidat me të cilët përballet komuniteti i ICT-së dhe rrjedhimisht vetë shoqëria dixhitale mbarëshqiptare.

Partneriteti i zgjeruar i ICTS Media në kuadër të edicionit të katërt të ICT Awards dhe me mbështetjen e partnerit strategjik Fondacionit “Dritan Hoxha”, Raiffeisen Bank Albania,  kompanisë së zhvillimit inxhinierik, Albsoft dhe shumë sponsorëve e partnerëve të tjerë, do t’i rrisë çmimet dhe shpërblimet për fituesit dhe kandidatët, veçanërisht në mbështetjen e realizimit të aplikimeve që do të shpallen fituese nga paneli i jurisë.

“Derisa sytë e të gjithëve janë drejtuar nga Mbrëmja Gala 29 Prillit, aplikuesit dhe finalistët kanë edhe disa sfida, ata do të përgatiten për të prezantuar dhe mbrojtur produktin dhe projektin e tyre para Jurisë njëmbëdhjetë anëtarësh ku do të ballafaqohen me pyetje nga më të ndryshmet, duke ju dhënë kështu eksperiencë të vyer në vetvete që do t’i shoqërojë gjatë karrierës së tyre profesionale”, thuhet në komunikatë.

Për ecurinë e vlerësimeve, opinioni publik do të njoftohet përmes partnerëve dhe mbështetësve mediatik, derisa kandidatët do të njoftohen drejtpërdrejtë përmes stafit organizativ të ICT Awards IV.

ICTS Media si themeluese dhe organizatore e vetme e Albanian ICT Awards thotë se ngjarja “ICT Awards” për të cilën kohëve të fundit ka pasur tentativa të ndryshme dhe të paautorizuara të keqpërdorimit të simbolit, logos, vlerave dhe identitetit me anë të disa nismave të ndryshme paralele, përfaqësohet vetëm nga ICTSmedia dhe nuk qëndron prapa nismave të tilla të kopjuara.

Kështu, çdo pranverë, Albanian ICT Awards, bëhet porta e sipërmarrësve dixhitalë dhe kreativëve të rinj me synimin e vetëm: impaktin shoqëror me vënien në shërbim të revolucionit të katërt industrial, teknologjisë së informacionit dhe komunikimit.