Kryetari i Komunës së Ferizajt, Agim Aliu, gjatë mandatit të tij katërvjeçar si udhëheqës i komunës, ka dështuar në realizimin e 13 premtimeve të dhëna gjatë fushatës së vitit 2021. Aliu kishte premtuar një Ferizaj me më shumë gjelbërim, shkolla dhe stadiume sportive, por pas katër vitesh ende nuk ka filluar realizimi i këtyre projekteve, shkruan Gazeta Insajderi.

Gjatë fushatës zgjedhore, Aliu, si kandidat për kryetar nga Partia Demokratike e Kosovës, kishte bërë gjithsej 69 premtime në programin e tij elektoral. Sipas një hulumtimi të publikuar nga Instituti GAP, nga këto premtime vetëm 39 janë realizuar plotësisht, 9 janë në gjysmë realizimi, 8 kanë filluar të implementohen, ndërsa 13 premtime nuk kanë nisur fare.

Një nga premtimet kryesore që Aliu kishte përdorur në fushatë ishte transformimi i Ferizajt në një qytet më të gjelbër, përmes krijimit dhe zgjerimit të parkut. Ai kishte premtuar rregullimin e parkut në zonën “Gjon Serreqi”, ndërtimin e parkut në hapësirat e ish-stacionit të autobusëve, si dhe zgjerimin e parkut në Rahovicë. Megjithatë, asnjë nga këto premtime nuk është realizuar.

Aliu kishte premtuar edhe ndërtimin e stadiumit të ri të futbollit, sallën e sporteve luftarake dhe krijimin e shkollës së sportit, por as këto projekte nuk kanë nisur ende.

Një prej projekteve për të cilat kryetari Aliu është krenuar është ndërtimi i mbikalimeve në Ferizaj, madje një prej tyre e kishte quajtur “nënkalimi më i madh në historinë e Kosovës”. Por, ndërkohë që e ndërlidhi qytetin me këto nënkalime, Aliu nuk e realizoi premtimin për gypin e gazit nga Maqedonia e Veriut drejt Kosovës.

Sipas raportit të GAP, disa prej premtimeve të tjera që nuk kanë nisur punën për realizim janë: zvogëlimi i borxhit të palëve ndaj komunës, digjitalizimi i shërbimeve komunale, shndërrimi i dy objekteve shkollore në shkolla me mësim tërë ditor, krijimi i parqeve zhvillimore për biznese, ndërtimi i mbikalimit në kryqëzimin e rrugëve “Brahim Ademi” dhe “Driton Islami”, si dhe mbrojtja dhe hapja e zonave të reja arkeologjike.

Agim Aliu mban postin e kryetarit të Ferizajt që nga viti 2017 dhe synon të marrë mandatin e tretë në zgjedhjet lokale që do të mbahen më 12 tetor.

IN Promo Marketing

Suksesi i radhës për ‘R & Rukolli Group’: Pijet e reja depërtojnë në tregun gjerman

Intel dhe Nvidia sjellin bashkëpunimin historik: Procesorë Intel me grafikë RTX të integruar

Shërbimi i Telefonave në Zone Mobile: Tani më Lehtë, Më Shpejt dhe Më Lirë!