11 ditë pas arrestimit nga autoritetet serbe, kosovarit Tefik Mustafa i është lejuar vizita e parë nga familjarët në burgun ku po qendron në Serbi.

Tefik Mustafa të martën është vizituar nga vajza e tij. Vizita e saj është mundësuar përmes kërkesës që ka bërë ambasada e Italisë pasi ajo ka nënshtetësi italiane.

Lajmin për Insajderin e ka konfirmuar djali i Tefik Mustafës, Qamili.

Ai thotë se motrës i është lejuar qëndrimi me babanë vetëm 15 minuta.

“Ende s’kam bisedu gjerësisht me të. Vetëm me ka tregu qe e kanë leju me vizitu babën 15 minuta”, tha ai për Insajderin.

Tefik Mustafa është arrestuar në Serbi nga autoritete serbe nën akuzën se ka kryer krime të pretenduara të luftës ndaj popullsisë jo-shqiptare, gjatë luftës në Kosovë më 1999, shkruan Insajderi.

Lidhur me akuzat që Serbia po e arsyeton arrestimin e tij, sipas Qamil Musfatës nuk janë reale. Ai thotë se babai i tij 1997 deri në 2004 nuk ka jetuar në Kosovë.

“Prej 1997 deri 2004 nuk ka mujt me ardhë në Kosovë sepse ka emigru për europë. Ka qenë azil në Itali e Gjermani”, ka thënë ai.

Tutje, Mustafa ka treguar se kontaktin e fundit me babain e tij e ka pasur momentin kur është arrestuar.

“Momenti i fundit kur na kemi kontaktu me të është ditën kur e kanë arrestu. I kanë thonë që me i thirr familjarët dhe me fol në gjuhen serbe. Ai është arrestu derisa po udhëtonte me autobus”, deklaroi ai.

65 vjeçari, Tefik Mustafa ka udhëtuar disa herë përmes Serbisë dhe asnjë herë nuk ka pasur probleme thotë djali i tij.

“Ka udhëtu disa herë për Serbi, kurrë nuk ka pas teleashe. Ka udhëtu mbi 10 herë”, tha Mustafa.