Ekonomisti i Partisë Demokratike të Kosovës, Arben Mustafa, ka reaguar pas rritjes së pensioneve për 20 euro nga Qeveria e Kosovës, duke vlerësuar se ky është “rezultati 4 vjeçar i kësaj qeverie”.

“Qeveria i paska rritë pensionet për hiq më shumë se 20 euro! 4 vite pritje me këtë qeveri, dyfishim i çmimeve për shumicën e produkteve bazike, dhe në fund rritje 20 euro!”, shkroi ai në Facebook, përcjell Insajderi.

Sipas tij “ky është rezultati 4 vjeçar i kësaj qeverie në përmirësimin e jetës së pensionistit”.

Ai ka akuzuar qeverinë se mori këtë vendim për ta shpërqendruar vëmendjen nga ai i lejimit të mallrave serbe në Kosovë.

“Këta njerëz nuk kanë pikë ndjeshmërie ndaj kushteve në të cilat sot jetojnë pensionistët! Madje edhe ky vendim ndoshta nuk do të merrej, nëse Albin Kurtit nuk do ti nevojitej shpërqendrimi i vëmendjes nga vendimi për lejimin e hyrjes së mallrave serbe!”, tha Mustafa.

Mes tjerash, ekonomisti i PDK-së deklaroi se me Bedri Hamzën në krye do të vijnë “pensione e paga të dinjitetshme”.

“Koha për pensione e paga të dinjitetshme po vjen me Kryeministrin Bedri Hamza! Nuk ka rrugë tjeter!”.