Kreu i AAK-së, Ramush Haradinaj, tha se në katër vitet e fundit mbi 200 mijë persona kanë braktisur Kosovën.

“211.789 persona e kanë braktisur Kosovën veç këto katër vitet e fundit. Mashtrimi i ndryshimit të madh të pushtetit shumë shpejt doli në pah dhe kjo i shtyri njerëzit që në masë të madhe dhe heshturazi zgjidhjen e problemeve ekonomike ta kërkojnë në rrugët e botës”, tha ai.

Haradinaj kërkoi të mos keqkuptohet meqë, sipas tij, është e drejtë njerëzore lëvizja, por thotë se ikja në Kosovë është “fenomen që po merr karakter të dyndjes”.

“Të mos keqkuptohemi, gjithmonë ka pasur dhe do të ketë migrim nga vendet e Ballkanit, pra edhe nga Kosova për në vendet perëndimore. Është e drejtë njerëzore e drejta për një jetë më të mirë. Megjithatë, ajo çka po ndodhë në Kosovë në këto katër vite nuk është më vetëm migrim, por ky fenomen po merr karakter të dyndjes. Kosova nuk ka problem migrimi por ka problem dyndjeje të popullatës”.

Ky reagim i tij erdhi pas deklaratës se Kurtit i cili tha se liberalizimi i vizave për Republikën e Kosovës nuk e ka rritur migrimin.