Disa orë pasi Prokuroria Speciale ngriti aktakuzë ndaj kryetarit të Mitrovicës, Agim Bahtiri, ai e cilësoi këtë veprim si një akt të turpshëm.

“Kjo është turpi. E kanë ba partitë politike. Kjo është SHIK. Pikë”, kishte thënë Bahtiri për Express.

Por një ditë më pas, Bahtiri i ka shkuar në zyrë ish shefit të SHIK-ut, tash kryetarit të Parlamentit, Kadri Veseli.

Veseli dhe Bahtiri janë takuar gjatë së enjtes, por edhe nuk e kanë bërë publik takimin që rëndom ndodhë kur takohen kryetari i Kuvendit dhe kryetari i një komune.

Por për Insjaderin, këtë takim e ka pohuar këshilltarit të kryetarit të Kuvendit, Blerim Latifi, arsyeja e këtij takimi ka qenë projekti i banesave sociale për banorët e Stantergut që jetojnë në objektet e kombinatit Trepça.

“Kryetari u pat premtuar marsin e shkuar se në bashkëpunim me komunën dhe Qeverinë do zhvendosen nga aty. Tani duhet të filloj implementimi në mënyrë që dimri që vjen të mos i zë përsëri aty. Asgjë tjetër”, ka thënë Latifi teksa ka treguar arsyen e takimit Veseli –Bahtiri.

Prokuroria njoftoi gjatë ditës se ekziston dyshimi i bazuar mirë, se Bahtiri dhe zyrtari i prokurimit duke vepruar në cilësinë e personave zyrtar, kanë keqpërdorë detyrën zyrtare, duke i tejkaluar kompetencat e tyre ose duke mos i përmbushur detyrat e tyre zyrtare.

Gazeta Insjaderi ka tentuar që të kontaktojë edhe kryetarin e Mitrovicës Agim Bahtiri, por ai nuk është lajmëruar thirrjeve tona.

Në anën tjetër, Latifi nuk komentoi këtë ngritje të aktakuzës e as deklaratën e Bahtirit për Veselin.

Foli për projektin duke treguar se është i Ministrisë së Punës dhe iniciativë e kryetarit dhe se implementohet në Komunën e Mitrovicës.

“Kaq”, përfundoi Latifi.

Gjatë së mërkurës, kryetari i Mitrovicës, duke folur për aktakuzën ndaj tij, madje tha se nëse vërtetohet se ka keqpërdorur çoftë edhe një cent nga komuna “do ta vrasë vetën”.