Në Klinikën Obstetrike Gjinekologjike të Qendrës Klinike Universitare (QKUK), gjatë vitit 2016, deri tani janë regjistruar gjithsej 87 raste të aborteve.

“Arsye më e shpeshtë e aborteve janë kushtet socio-ekonomike, por ka edhe raste të rralla të divorceve”, thotë drejtuesi i repartit të planifikimit familjar ku kryhen abortet, Jakup Ismajli.

Ai thekson se nga 87 raste, “ tetë janë që kanë kryer për herë të parë abortin, do të thotë që nuk kanë lindë, kurse tjerat kanë pasur dy e më shumë lindje”, shkruan lajmi.net.

Pas luftës, numri i aborteve ka qenë dukshëm më i madh. Mirëpo, sipas tij, numri i aborteve në Klinikën Obstretrike Gjinekologjike (KOGJ), në 5-vjetët e fundit ka rënë dukshëm.

“Ka filluar planifikimi familjar, përdorimi i mjeteve kontraceptive, kështu që ky numër nga viti në vit po vjen duke rënë”, ka shtuar Ismajli.

“Abortet kryhen nga java e gjashtë e shtatzënisë deri në javën e dhjetë. Kurse krijimi i organeve tek fetusi kryhet pas javës së 12”,  shprehet ai.

Mosha rreth së cilës kryhen më shumë aborte, sipas Ismajlit, sillet prej 18 deri në 40 vjeç.