Preteni e Petrovci pasi kishin fituar të drejtën për të shkuar në Turqi, kishin lidhur një kontratë me MPB-në, që pas kthimit të tyre të punësohen në këtë Ministri, apo institucionet vartëse të saj, në Policinë e Kosovës, Inspektoratin Policor, apo diku tjetër.
Por edhe pas rreth tre vjetëve të diplomimit ende vazhdojnë të jenë të papunë dhe të kërkojnë derë më derë të drejtën e tyre.
Më 27 gusht 2008 shteti i Turqisë i kishte paraqitur një ofertë Ministrisë së Punëve të Brendshme, ku kishte shprehur vullnetin që t’u ndajë bursa 5 personave nga Kosova për diplomim në Akademinë e Policisë së Turqisë.
Diplomimi për vetëm një person shtetit turk do t’i kushtonte 100 mijë dollarë për 5 vjet, 1 vit mësimin e gjuhës, kurse 4 vjet studime. Në atë kohë, ministër i Punëve të Brendshme ishte Zenun Pajaziti, i cili e kishte nënshkruar këtë memorandum me zyrën turke në Kosovë.
Por tash e tre vjet Çlirim Petrovci thotë se po pret nga institucionet e Kosovës që të përmbushin kontratën të cilën e kanë nënshkruar vetë.
“Ne si gjeneratë e parë, studimet i kemi filluar në vitin 2008 dhe kemi diplomuar në vitin 2013, do të thotë këtë verë bëhet viti i tretë që jemi të diplomuar dhe jemi pa punë”, thotë Petrovci për “Zërin”, i cili nuk ka lënë derë pa trokitur, por nuk ka marrë asnjë përgjigje. (Zëri)
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
