Deputeti i Partisë Demokratike të Kosovës, Bekim Haxhiu ka shprehur shqetësimin për ngjashmërinë e simptomave të gripit sezonal me ato të variantit Omicron të virusit Covid-19.
Haxhiu tha sot në seancën e Kuvendit të Kosovës se pritet që ditëve në vijim të ketë rritje të rasteve me këtë virus.
“Situata me pandeminë Covid-19 në muajin e fundit në vendin tonë ka qenë me tendencë të rritjes por ishte e qetë. Mirëpo, rreziku për përkeqësim të situatës i paralajmëruar nga ekspertët shëndetësor rezulton të jetë prezent në ditët në vijim dhe kjo po shihet nga shtimi i numrit të rasteve”, tha ai.
Haxhiu ka përmendur edhe numrin e lartë të qytetarëve të prekur me gripin sezonal. Ai tha se situata me grip sezonal në spitale dhe në QKMF është alarmante.
“Situatë më e rëndë në muajin e fundvit ka qenë me gripin sezonal dhe ka kohë që sistemi ynë shëndetësorë ka kaluar vetëm në kujdes për Covid-19 dhe janë anashkaluar sëmundjet e tjera, përjashtimisht rasteve urgjente. Për shkak të neglizhencës, mos vaksinimit dhe të keq menaxhimit situata me gripin sezonal në spitalet tona dhe në QKMF është alarmante”, ka thënë ai.
Deputeti i PDK-së konfirmoi se nga të dhënat e IKSHPK-së, nga 6-12 dhjetor janë shënuar mbi 6 mijë raste të qytetarëve që janë prekur me grip sezonal.
“Sipas IKSHKP-së vetëm nga 6 dhjetori deri me 12 dhjetor janë shënuar mbi 6 mijë raste të gripit sezonal. Numri i rasteve me grip sezonal e kalon 20 mijë raste. Simptomat e gripit sezonal dhe të variantit Omicron janë me simptomatologji të njëjtë. Pra, lodhje, dhimbje koke, dhimbje fyti, gërvishtje dyti. Dilemat e shumë qytetarëve sot që përballen me këto simptoma janë se a janë të prekur me grip sezonal apo të infektuar me variantin Omicron”, ka deklaruar Haxhiu.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
