Ishte befasuese kur Arda Guler kishte shfaqur kryeneqësi për të mbetur në klub, ndonëse të gjithë prisnin një largim në formë huazimi, për të shfaqur aftësitë e tij.
Mirëpo, gjashtë muajt e parë të karrierës së tij në kryeqytetin spanjoll ishin të mbushura plot lëndime, dhe kur i kalonte ato, nuk kishte minuta të kënaqshme në fushë.
Megjithatë, në muajt e fundit të sezonit të kaluar, dukej se gjithçka po shkonte mirë për senzacionin turk, duke treguar paraqitje të mëdha në La Liga.
Sezoni i ri, ky i tashmi, ishte projektuar që Arda Guler të ketë rol më të rëndësishëm në skuadër, por duket se nuk do të jetë ashtu.
Kjo pasi turku i ri ka vetëm dy paraqitje në tetë ndeshjet e fundit, të dyja në Kupën e Mbretit.
Disa raportime nga Spanja kanë thënë se Guler do të largohet në formë huazimi nga Reali, si pasojë e minutazhës së paktë, mirëpo “Relevo” e ka ‘përmirësuar’ këtë lajm.
Sipas burimeve të tyre, Guler ose do të ketë rol më të madh në skuadër sezonin e ardhshëm, ose do të largohet në mënyrë të përhershme.
20-vjeçari nuk e ka ndërmend të kalojë edhe një sezon tjetër duke ngrohur bankën rezervë.
Kampi i lojtarit nuk mund ta kuptojnë se si një lojtar si Guler – i cili ka shprehur dëshirën për të mbetur në klub – nuk ka shumë mundësi në skuadër.
Para pak ditësh, trajneri i Realit, Carlo Ancelotti kishte thënë se nuk ka probleme personale me Gulerin, por vetëm se lojtari po kalon në një proces normal, në një klub të madh si Real Madridi.
Guler u transferua te Reali në verën e vitit 2023 nga Fenerbahçe, pas një gare mes Real Madridit dhe Barcelonës, për nënshkrimin e tij
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
