Ambasadori i Kosovës në Kroaci, Martin Berishaj, është përballur me një dështim në tentativën e tij për të manipuluar procesin e votimit gjatë zgjedhjeve të fundit, 9 shkurtit. Sipas një burimi të besueshëm të Insajderit brenda Komisionit Qendror të Zgjedhjeve, bëhet fjalë për keqpërdorimin e 30 zarfeve me vota të dyshimta. Mësohet se këto zarfe u tërhoqën nga Ambasada e Kosovës në Kroaci dhe, për shkak të dyshimeve mbi legjitimitetin e tyre, këto vota nuk do të numërohen.

Në anën tjetër, Prokuroria Themelore e Prishtinës ka konfirmuar se janë duke e hetuar rastin.

Ata kanë njoftuar se janë duke kërkuar detaje nga KQZ për mënyrën se si janë pranuar dhe menaxhuar dërgesat nga Ambasada e Kosovës në Kroaci.

“Lidhur me pyetjen tuaj ju informojmë, se Prokurori i shtetit ka autorizuar Policinë e Kosovës/ Drejtoria për hetimin e krimeve të rënda për grumbullimin e informatave të nevojshme rreth këtij rasti, nga KQZ kemi kërkuar detaje rreth mënyrës së pranimit të këtyre dërgesave dhe menaxhimit të tyre nga ana e Ambasadës së Republikës së Kosovës në Kroaci”, thuhet në përgjigjen e tyre për Insajderin.

Por, si ndodhi rasti?

Pak ditë para zgjedhjeve, Ambasadori i Kosovës në Kroaci, Martin Berishaj, veproi jashtë çdo procedure zyrtare duke marrë vetë të gjitha zarfe me fletëvotime nga posta dhe duke i dërguar në ambasadë. Ky veprim i Berishajt kishte ngritur shqetësime serioze për mundësinë e manipulimit të votave të diasporës.

Në një takim online të organizuar nga Komisioni Qendror i Zgjedhjeve me përfaqësuesit diplomatikë të Kosovës në botë, vetë ambasadori Berishaj kishte konfirmuar hapur se kishte ndërhyrë në procesin e administrimit të votave të diasporës.

Pas këtij skandali, KQZ kishte mbajtur një mbledhje, por kryetari i këtij institucioni nuk kishte qenë në gjendje të tregonte se çka kishte ndodhur.

“Zyrtarisht ende nuk dimë asgjë. Kemi dëgjuar edhe prej mediave, ka edhe fjalë nga KQZ-ja, por zyrtarisht ende nuk e dimë çfarë ka ndodhur. Mbeten të vërtetohen në fazat e mëvonshme,” kishte thënë Kreshnik Radoniqi kur u pyet nga gazetarët, pas mbledhjes së KQZ-së më 7 shkurt.

Sidoqoftë, numërimi i votave të diasporës nga përfaqësitë diplomatike është përmbyllur, duke përfshirë edhe Ambasadën e Kosovës në Zagreb.

Sipas rezultateve për zgjedhjet e vitit 2025, Lëvizja Vetëvendosje ka arritur të fitojë me 79.65% të votave, duke siguruar gjithsej 90 vota. Pas saj, ka ardhur Lidhja Demokratike e Kosovës (LDK) me 15 vota, që përfaqësojnë 13.27% të totalit të votave, ndërsa Partia Demokratike e Kosovës (PDK) ka marrë vetëm 5 vota, ose 4.42% të rezultatit.

/Insajderi

IN Promo Marketing

Suksesi i radhës për ‘R & Rukolli Group’: Pijet e reja depërtojnë në tregun gjerman

Intel dhe Nvidia sjellin bashkëpunimin historik: Procesorë Intel me grafikë RTX të integruar

Shërbimi i Telefonave në Zone Mobile: Tani më Lehtë, Më Shpejt dhe Më Lirë!