Rilind Murati, një nga shtatë personat e arrestuar të martën për dyshimin e përfshirjes në planifikimin dhe ekzekutimin e rreshterit të Policisë, Muhamed Lika, në Kaçanik, rezulton të ketë përhapur përmbajtje ekstremiste dhe thirrje kundër sistemit demokratik në rrjetet sociale.
Sipas Prokurorisë, Rilind Murati, i lindur në vitin 2003, e kishte pritur të miturin Rejhan Bela në katin e dytë të një ndërtese, nga ku dyshohet se ky i fundit kishte qëlluar për vdekje rreshterin Lika më 1 prill.
Në vendin e ngjarjes janë gjetur katër gëzhoja të kalibrit 9.19 mm. Pas sulmit, Murati e kishte përgëzuar të miturin duke i thënë: “Bravo, ik”, dhe më pas të dy ishin larguar nga vendi i ngjarjes.
Nga kërkimet shihet se Murati kishte një profil aktiv në Facebook, ku shpërndante materiale me përmbajtje radikale dhe kundër institucioneve demokratike.
Në një video të publikuar më 6 mars, thuhej:
“Ata kundërshtojnë sunnetin. Ata thërrasin në votime. Ata marrin pjesë në portale anti-islame… Ata e lejojnë demokracinë. Ata janë këpucë lëpirës të tagutit…”
Po ashtu, më 23 shkurt, Murati kishte shpërndarë një tjetër video ku shiheshin persona duke thyer instrumente muzikore, shoqëruar me komentin:
“Muzika e forcon sihrin dhe xhint (në trupin tuaj).”
Policia ka konfirmuar se operacioni i arrestimeve është zhvilluar në bashkëpunim me institucionet relevante të sigurisë dhe ka për qëllim zbardhjen e plotë të motiveve dhe rrjetit të përfshirë në këtë akt kriminal.
Gjashtë të dyshuarit për vrasjen e rreshterit Muhamed Lika janë dërguar në Gjykatën Themelore në Ferizaj, ku pritet të mbahet seanca.
Prokuroria Themelore në Ferizaj ka bërë kërkesë zyrtare për caktimin e masës së paraburgimit ndaj gjashtë personave të dyshuar për përfshirje në vrasjen e rreshterit Muhamed Lika, ngjarje që ndodhi më 1 prill në Kaçanik
Lexo edhe:
Të dyshuarit janë: Haki Bela, Edmond Lika, Shkëlqim Kuka, Rilind Murati, Diamant Gashi dhe Vatan Çaka ndaj të cilëve pritet të nis seanca në orën 13:00.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
