Drejtori ekzekutiv i Al-Hilal, Esteve Calzada, ka konfirmuar se Arabia Saudite ka zhvilluar bisedime me Vinicius Junior në lidhje me një transferim të mundshëm në Lindjen e Mesme.
Ylli i Real Madridit pritet gjerësisht të nënshkruajë një rinovim kontrate me “Los Blancos” këtë verë.
Kontrata aktuale e Vinicius skadon në vitin 2027 dhe që verën e kaluar kishte zëra për një marrëveshje të re për 24-vjeçarin.
Real Madridi kishte shprehur interesin për ta rinovuar kontratën e tij, por Vinicius kishte shtyrë bisedimet, ndërkohë që raportohej se kishte pasur kontakte me përfaqësues nga Arabia Saudite për një transferim të mundshëm, me shifra që varionin nga një kontratë prej 1 miliard eurosh deri në një tarifë transferimi prej 300–400 milionë eurosh.
Megjithatë, në muajin mars, Vinicius duket se kishte arritur marrëveshje për të zgjatur kontratën me Real Madridin, pavarësisht rrjedhjeve nga kampi i tij, ku pretendohej se marrëveshja ende nuk ishte finalizuar.
Duke folur për Cadena SER, Calzada u shpreh se Arabia Saudite beson se është në gjendje të realizojë çdo transferim të madh për momentin.
“Po hyjmë fuqishëm në treg sepse e dimë që kemi mjetet për të bindur këdo, jo vetëm me para”, tha Calzada.
Megjithatë, ai pranoi se shumë thashetheme nuk kanë bazë të fortë dhe se shpesh agjentët i përdorin spekulimet për interesim nga Arabia Saudite për të përmirësuar pozitat e tyre në negociata.
Calzada gjithashtu konfirmoi se drejtori ekzekutiv i ligës ka zhvilluar bisedime me disa ekipe dhe se nuk do të habitej nëse Vinicius do të përfundonte në Ligën Saudite.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
