Bota e futbollit është ende në shok për vdekjen e yllit të Liverpoolit, Diogo Jota, i cili vdiq së bashku me vëllain e tij Andre Silva në një aksident me makinë të enjten në mëngjes.
Jota dhe Andre vdiqën në një Lamborghini ndërsa udhëtonin nëpër Spanjën veriore për të kapur një traget për në Mbretërinë e Bashkuar.
Makinës së tij, me vlerë 174,000 euro, dyshohet se i është plasur një gomë ndërsa po parakalonte në rrugën A-52 në Cernadilla pranë Zamorës, vetëm 16 kilometra larg kufirit me Portugalinë.
Që nga ai moment, shumë sportistë dolën përpara dhe i bënë dedikime futbollistit portugez, dhe vetëm mbrëmë miku më i mirë i Jotas midis futbollistëve, Ruben Neves, gjeti forcën për ta bërë këtë.
“Kudo që të jesh, e di që do ta lexosh këtë. E di që ti kishe po aq shumë rëndësi për mua sa unë për ty. Ne jemi më shumë se miq, jemi familje dhe nuk do të ndalemi së qeni të tillë vetëm sepse ti vendose të nënshkruash një kontratë pak më larg nesh”.
“Kur të shkoj në mbledhjen e ekipit kombëtar, ti do të jesh prapë pranë meje në tavolinë, në autobus, në aeroplan… Do të sigurohem që të dashurve të tu të mos u mungojë kurrë asgjë, sepse ti je këtu, larg nesh, por ti mendon për ne dhe na pret”.
“Jeta na bashkoi dhe tani nuk mund të na ndajë. Që tani e tutje, ti gjithmonë do të dalësh në fushë me mua dhe ne do të ecim së bashku në rrugën tonë, aty ku u takuam. Të dua!”, shkroi Neves në profilin e tij në Instagram.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
