Në pikat e karburantit zakonisht gjenden dy lloje benzine: ai më i përhapur me 95 oktan dhe ai më pak i zakonshëm me 98 oktan. A mund t’i përdorim të dy apo secili është i dedikuar për një lloj të ndryshëm motori? Dhe çfarë ndodh nëse i përziejmë?
Problemi me përzierjen e karburantit zakonisht lind kur vendosni dizel në një motor benzine apo anasjelltas. Por çfarë ndodh nëse rastësisht përzieni benzinën me 95 dhe 98 oktan?
Për fillim, vlera oktanike (në këtë rast 95 ose 98) tregon rezistencën e benzinës ndaj ndezjes së parakohshme brenda motorit. Sa më e lartë të jetë kjo vlerë, aq më shumë karburanti mund të përballojë kompresionin pa shpërthyer para kohe. Kjo do të thotë që benzina me 98 oktan zgjat më shumë dhe është formuluar për motorë me kërkesa të larta kompresioni, siç janë motorët me performancë të lartë ose disa hibride.
Megjithatë, duhet pasur parasysh se kalimi nga benzina 95 në 98 dhe anasjelltas nuk sjell ndonjë përfitim. Përkundrazi, mund të ketë disa të meta të vogla. Nëse përzieni një sasi të konsiderueshme të këtyre dy llojeve benzine, motori nuk do të pësojë ndonjë dëm, të paktën jo menjëherë, edhe pse nuk rekomandohet ta bëni shpesh. Çdo motor është projektuar për një lloj të caktuar benzine, prandaj gjithmonë rekomandohet të përdorni atë që është e përcaktuar për të.
Pyetja kryesore është: çfarë ndodh nëse hidhni benzinë me 98 oktan në një makinë që është projektuar të punojë me benzinë me 95 oktan? Vetura nuk do të fitojë më shumë fuqi apo ndonjë përfitim të veçantë – përkundrazi, mund të shpenzojë më shumë karburant.
Po në rastin e kundërt? Nëse një motor që është projektuar për benzinë 98 punon me benzinë 95, mund të vëreni ulje të performancës ose edhe funksionim të çrregullt të motorit.
Në të njëjtën mënyrë, miti se benzina 98 pastron rezervuarin e një makine që përdor benzinë 95 nuk është i vërtetë. Kjo varet vetëm nga aditivët e pranishëm në secilin karburant, e jo nga vlera oktanike. Për këtë qëllim është më mirë të përdorni karburant premium ose aditivë specifikë.
Nëse po pyesni veten nëse 98 është më e mirë – ekspertët thonë shkurt: jo domosdoshmërisht. Nëse makina juaj është ndërtuar për të përdorur benzinë me 95 oktan, përdorimi i benzinës me 98 nuk do të përmirësojë performancën, nuk do të ulë konsumimin e karburantit dhe nuk do ta zgjasë jetën e motorit.
Nëse rastësisht keni përzier benzinën me 95 dhe 98 oktan në rezervuar, mos u shqetësoni. Makina nuk do të pësojë dëm, për sa kohë që në rezervuar është në shumicë lloji i rekomanduar i karburantit dhe për sa kohë që nuk e bëni shpesh këtë praktikë. Nëse nuk jeni të sigurt se çfarë lloj benzine duhet të përdorni, shikoni rekomandimin e prodhuesit që zakonisht ndodhet në anën e brendshme të kapakut të rezervuarit.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
