Mbrojtësi i Paris Saint-Germain dhe përfaqësuesi i Marokut, Achraf Hakimi, mund të përballet me një proces gjyqësor pas akuzave për përdhunim, sipas të përditshmes franceze Le Parisien.
Prokuroria e Nanterre ka paraqitur më 1 gusht 2025 një kërkesë për aktakuzë për ta çuar çështjen para gjykatës penale të Hauts-de-Seine.
Ngjarja e dyshuar ka ndodhur në shkurt të vitit 2023, në shtëpinë e Hakimit në Boulogne-Billancourt pranë Parisit. Ai e ka mohuar gjithmonë kategorikisht akuzën.
Sipas Le Parisien, viktima e dyshuar, 26 vjeçe, kishte komunikuar me futbollistin përmes Instagram-it për më shumë se një muaj, përpara se ta vizitonte në banesë. Ajo pretendon se Hakimi e ka puthur dhe prekur pa pëlqimin e saj dhe më pas e ka detyruar me forcë. Fillimisht, ajo nuk bëri një kallëzim formal, por më pas dorëzoi mesazhe te hetuesit që përshkruanin traumën që kishte përjetuar.
Hakimi u vu nën hetim zyrtar më 3 mars 2023 dhe u mor në pyetje duke kaluar pak orë në paraburgim. Ai ka mohuar gjithçka, duke pretenduar se bëhet fjalë për një tentativë për shantazh financiar.
Paris Saint-Germain ka vazhduar të qëndrojë në krah të lojtarit, duke theksuar besimin në procesin gjyqësor.
Klubi deklaroi se mungesat e tij në stërvitje ishin për “arsye personale”.
Në dhjetor 2023, Hakimi dhe paditësja u përballën në gjykatë, ku secili qëndroi në versionin e tij të ngjarjeve.
Më pas, në janar 2025, Hakimi deklaroi për një bloger: “E vërteta është që kur je i suksesshëm, bëhesh një shënjestër e lehtë për disa njerëz. Ata donin të më shantazhonin, prandaj edhe bëmë kallëzim. Drejtësia ka vepruar mirë deri tani.”
Çështja është aktualisht në duart e gjyqtarit hetues, i cili do të vendosë nëse do të ketë apo jo një proces penal. Nëse shpallet fajtor, Hakimi përballet me një dënim deri në 15 vite burg.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
